Omskinıñ ölkä tatar milli – mädäni möxtariäte urnaşqan bina öçen arenda bäyäsen tüläw xäl itelmäslek mäsälägä äylänüe turında Azatlıq tıñlawçıları inde xäbärdärlär. Möxtariät aktivınıñ anı çişü östendä törle yünäleştä eş alıp baruı turında da tıñlawçılar iğtibarına citkergän idek.
Moxtariät citäçelege bu problemanı tatar millätennän bulğan eşmäkärlär aldına quyıp, bergäläp çişü yulların ezläw häm ber uñaydan yärdäm dä soraw maqsatı belän uzğan yal könendä şuşı binada oçraşu kiçäse ütkärde. Kiçägä Omskida eşmäkärlek belän şöğıllänüçe tatar keşeläre çaqırıldı. Alarğa aldan uq çaqıru biletları häm kilep çıqqan problema añlatılğan möräcäğät xatları tapşırılğan ide. Äytergä kiräk, anda 50-gä yaqın eşmäkär çaqırıldı. Alarnıñ küpçelege çarada qatnaşırğa rizalığın beldergän bulsa da, kilüçelärneñ sanı 20-dän artmadı. Döres, oyıştıruçılarnı, mädäni programma äzerläwçelärne isäpkä alğanda kiçädä 40-tan artıq keşe qatnaştı.
Älege çara citdi problemanı xäl itü maqsatınnan oyıştırılğan bulsa da, küñelle çäy östäle artında ütte, çäydän quatleräk eçemleklär dä bulmadı tügel. Kiçä barışında üzara tanışıp, aralaşqannan soñ problemanı urtağa salıp söyläşü bardı. Şunı da äytergä kiräk, oyıştıruçılar qunaqlarnıñ tatar telen belülärenä ikelänep axrı,kiçäne rus telendä alıp bardılar, gärçä küpçelek telne yaxşı belüen kürsätsä dä.
Möxtariätneñ koordinatsiä şurası räise Marat Katıyrov qunaqlarğa binanı saqlap qalunıñ möhimlegen añlattı, bu eştä alardan yärdäm soradı. Äytergä kiräk berniqädär yärdäm kürsätüçelär tabıldı- kiçä barışında 7 meñgä yaqın aqça cıyıldı. Älbättä, bu summa 24 meñnän artıp kitkän ber aylıq arenda bäyäsen qaplarğa da citmi. Axırda min qayber qunaqlarnıñ tatar eşmäkärläre yärdäme belän binanı saqlap qalu mömkinlege turında fikerläre belän qızıqsındım. Alar fikerençä, bolay aqça cıyıp qına problemanı xäl itü mömkin bulmayaçaq. Ber öç ay yärdäm itärgä bula,küp digändä, şul arada närsäder uylarğa kiräk.
Döres, moxtariät citäkçelege dä, aktivistlar da, koordinatsiä şurası räise dä, äle xälleräk tatar keşelären cälep itärgä mömkinleklär bar häm bu yünäleştä eşne däwam itärgä kiräk dip sanıylar.
Menä şulay, älegä tatar maltabarlarına möräcäğät itü ällä ni zur tabış kitermäde.
Kiläçäktä başqa yullar tabılırmı, ğomumän möxtariät
yazmışında nindi üzgäreşlär bulır – aldağı xäbärlärebezdä beldererbez.
Rozaliä Sayganova, Omski.
