Accessibility links

Кайнар хәбәр

Omskida dini kitap çığarğan yeget qulğa alındı


Omskida Bädiüzzaman Säid Nursineñ “Risale-i Nur” äsärlär cıyılmasınnıñ ber kitabı bulğan “Plodı verı” digän basmasın çığarğanı öçen qazax yegete Cambul İsabaev qulğa alındı. Omski prokuraturası älege kitapnı törle dinnär arasında doşmanlıq uyata, näfrät xisläre tärbiäli häm möselman bulmağan din wäkillären tübänsetä dip tapqan ide. Bu ğaepläw Omsk däwlät universitetınıñ etnologiä häm muzey eşläre kafedrası dotsentı Aleksandr Seleznev häm şul uq universitetnıñ islam dine buyınça belgeç Vyaçeslav Danilov yasağan analizlarğa tayanıp eşlände.

Berniqädär waqıttan soñ, älege ğaepläwgä, Cambulnıñ fatirında tentü yasağan waqıtta tabılğan şartlatqıç-şaşqa östälde. Bu inde yegetneñ ğaeben köçäytep, aña terrorçılıq möheren dä tağarğa mömkinlek birde. Şulay itep, cinayät eşe açıldı, tikşerülär başlandı. Bälägä tarığan Cambul İsabaev yaqlawçı ezläp, tatar möxtariäte räise- Xäkim Sadıyqovqa möräcäğät itä. Ğädäti bulmağan eşkä alınğaç, Xäkim äfändegä başqa şähärlärdäge belgeçlärgä dä möräcäğät itärgä turı kilä.

Yaqlaw eşenä tanılğan Mäskäw advokatı Vladimir Ryaxovskiy da quşıla. Mäğlüm bulğança , Ryaxovskiy äfände Yuğarı mäxkämädä moselman xatın-qızlarınıñ dokumentlarğa yaulıq bäyläm fotoğa töşärgä xoquqlı buluların isbatlağan advokat.

Şuşı könnärdä genä 8 ayğa yaqın barğan älege eş şähärneñ Kirov okrugı mäxkämäsendä qaraldı. Mäxkämä barışında yaqlawçılar, ğalimnär häm şähitlär tarafınnan Cambulnıñ ğaepsez buluı dälillände häm nigezlände. Säid Nursineñ “Plodı verı” kitabında ekstremistik fikerlär bulmawı da isbatlandı. Ä Cambulnıñ fatirında tabılğan şartlatqıçnıñ anıqı buluı isbatlanmadı. Şunı da azsızlıqlarğa kiräk, kitapnı zararlı dip kürsätkän din ähelläre dä, analiz yasağan universitet belgeçläre dä “Kitap turında bez başqaçaraq fikerdä idek, mäxkämä eşendä ul bez uylağança kürsätelmägän”, - dip alda birgän mäğlümätlärenän baş tarttılar.

Näticädä, sud''ya Nadejda Libes Cambul İsabayıwnıñ ğaebe yuq dip taptı häm aqlaw xökeme çığardı. Bu urında tınıçlanıp, yaqlawçılarnı häm aqlanuçını täbriklärgä mömkin bulır ide. Ämma eşkä noqta quyarğa irtäräk bulıp çıqtı. Prokuratura, qarar belän riza bulmıyça, eşne ölkä mäxkämäsenä apellyatsiägä birde. Döres, Xäkim äfände anda da ciñügä ireşügä ömetlänä. Saniä Mirxaleewa. Omski.

XS
SM
MD
LG