Accessibility links

Кайнар хәбәр

Bäyrämne tatarça qarşılıybız: Yekaterinburg


Bu könnärdä Yekaterinburg şähärendä häm Sverdlov ölkäsendä Böyek Ciñüneñ 60 yıllığına bağışlanğan çaralar däwam itä. “Aq qalfaq” isemle tatar xatın-qızları cämğiäte küptän tügel Tatarstannıñ Uraldağı daimi wäkillege binasında suğışta qatnaşqan millättäşlärebez belän oçraşu kiçäse oyıştırdı. Kiçäne tirän eçtälekle, bay itep oyıştıruda wäkillek xezmätkärläre Ğäliä xanım Bikbova häm Xäydär äfände Gıylfanov bik zur köç quydılar. Tantanağa xalıq bik küp bulıp cıyıldı. Çaqırılğan qunaqlar arasında suğış häm xezmät veterannarı, kürenekle cämäğät eşlekleläre, artistlar bar ide.

Tatarstannıñ atqazanğan artistı Xäydär Gıylfanovnıñ tatar xalıq cırların başqaruın qunaqlar küz yäşläre belän tıñladılar. Xalıq cırlarınnan tış, biredä kürenekle tatar kompozitorları äsärläre, romanslar yañğıradı. Ural däwlät konservatoriäsendä belem aluçı tatar qızı Güzäl Şaxmatova başqaruında Röstäm Yaxin köyenä yazılğan cırnı da veterannar bik yaratıp qabul ittelär. “Kügärçen” ürnäk balalar ansamble qunaqlar aldına yaña programma äzerläp kilgän ide. “Aq qalfaq” oyışması citäkçese Tañçulpan xanım Jdanova, tatar yäkşämbe mäktäbenä yörüçe balalar belän bergä “Tuğan ilem, köräşkä bas” häm “Ciñü” cırların tatarçağa tärcemä itep äzerläp kilgän. Ataqlı Vasiliy Terkin rolen başqaruçı, Rusiäneñ atqazanğan artistı Räis Gallämov Vasiliy Terkinğa bağışlanğan poemadan özek uqıdı. Kürenekle akter zalda utıruçılarnı ul yıllarğa alıp kerep kitte kebek.

Veterannar da üzläreneñ xatiräläre belän büleştelär. “Aq qalfaq” oyışması äğzası Orqıya apa Xayälieva suğışnı şofer bulıp başlağan, pulemetçi bulıp betergän. Ciñüne Berlinda qarşı alğan. Ul yıllarnı bik dulqınlanıp iskä ala ul. Suğış veteranı İl'fat Xafiz ulı Qayumov bügen dä safta. Ul Sverdlov ölkäse buyınça suğış häm tıl veterannarı komitetı räise. Bu yıl başınnan veterannarğa qarata bulğan taşlamalarnı ölkädä saqlap qalu buyınça bik küp köç quyğan keşe ul. Anıñ fikerençä, suğış veterannarına iğtibar citärlek, ä menä tıl veterannarına qarata bulğan taşlamalarnı qaytaru öçen küp eşlise bar äle. Alar da bit olı xörmätkä layıqlı keşelär.

Kiçä bik mul itep äzerlängän tabın yanında däwam itte. Çäy tabını milli rizıqlardan sığılıp tora ide. Saf tatar telendä aralaşıp utıru, çın garmun tawışına milli köylär tıñlaw, quşılıp cırlap utıru, tuğan tatar moxitına çumu qunaqlarnıñ küñelenä bik xuş kilde. Veterannar kiçäne oyıştıruçılarğa olı räxmätlär uqıdılar.

Sverdlov ölkäseneñ başqa şähärlärendä dä tatar veterannarın xörmätläw kiçäläre däwam itä. Şundıy kiçälärneñ berse Yuğarı Pışma şähärendä bulıp uzdı. Kiçäne Yuğarı Pışma tatarlarınıñ milli-mädäni avtonomiäse räise Täsqıä xanım Safiullina oyıştırdı. Kiçäne oyıştıruda bulışqan igelekle tatar yegetlärenä räxmätläre çiksez Täsqıä apanıñ. Ul veterannar öçen zur tabın äzerlärgä bulışqan Yuğarı Pışma yegetläre Rodion Safiullin, Zöfär Xaciev, Yekaterinburg yegete Rinat Sadrievqa olı räxmätlär uqıdı. Kiçä barışında veterannar öçen bik matur konsert ta äzerlängän ide. Xäydär Gıyl'fanov, Robert Xäbibraxmanov, Boris Zakirov kebek Sverdlov ölkäseneñ tanılğan cırçıların xalıq bik yaratıp qabul itte.

Böyek Ciñü kebek qäderle bäyrämne üz millättäşläreñ belän bergä, üz teleñdä aralaşıp, üz cırlarıñnı cırlap qarşı aludan da zur bäxet yuq dip, räxmät uqıdılar veterannar.

Fäwiä Safiullina, Yekaterinburg
XS
SM
MD
LG