«Tatnet yoldızları» bäygese internetqa qatnaşlığı bulğan keşelärneñ iğtibarın torğan sayın nığraq cälep itä başladı. Bäyge başlanğan 1 ay eçendä, 40tan artıq sayt terkälep, qatnaşırğa teläk belderde. Soñğı waqıtta qatnaşuçılar yanına, tağın ber niçä yaña sayt östälde. Alar arasında www.tatar.cz – Çexiä tatarları saytı, www.sopkgu.narod.ru/tabigat.htm - tabiğät saqlaw xezmäte, www.fandas-safiullin.ru Säyäsätçe Fändäs Safiullinnıñ şäxsi internet saytı, www.kros.ru – Qazan regional belem birü çeltäreneñ internet säxifäläre belän dä tanışıp bula. Ğarizalar äle avgust ayına qädär qabul itelergä mömkin. Şuña kürä, bu waqıt eçendä, äle yaña saytlar belän tanışırbız. Ämma bäyge başlanğan waqıt eçendä, qatnaşırğa telägän keşelärdän tänqit süzläre dä işetelä başladı. Mäsälän, bäygeneñ nigezlämäsendä, tatar telendäge saytlar, ike genä nominatsiädä qarala ala. Berençese - mäğlümat çarası, ikençese – tuğan tel. Ä yarışnıñ başqa törlärendä, iñ yaxşı «Tatarstan respublikası» saytı, iñ yaxşı «tatar dönyası» saytı, «Qazannıñ 1000 yıllığı», «mäğlümat çarası» häm «xobbi», digän nominatsiälärdä, urıs telendäge säxifälär genä qatnaşa bulıp çığa. Bäygeneñ nigezlämäsendä bu turıdan turı yazılmağan, ämma, asta, waq xäref belän ber añlatma birelä. Säxifälärneñ urıs telendäge eçtälegenä genä bäyä bireläçäk, dip yazılğan anda. «Tatar dönyası» nominatsiäsenä turı kilä torğan internet sayt tatar telendä bulsa, ul bäygedä qatnaşa almıy bulıp çığamı? Bu sorawnı jyuri räise häm oyıştıruçılarnıñ berse İrek Bikkininnga birdek. Ul älegä cawap birmäde, ämma, soñınnan, üz süzen äyter, dip ömetlänik. Bu temanı tapşıruıbıznıñ aldağı çığarılışında däwam itärbez. «Tatnet» yoldızları bäygesendä tatar telendäge säxifälär öçen 2 genä nominatsiä qaralağan bulğanğa kürä, Ali Aqqış isemendäge litsey saytı, Çexiä tatarlarnıñ yäşäşe turında häm tatarça informatikä däresläre digän internet saytlar, barısı bergä, şul uq, yarışnıñ «tuğan tel» digän törendä köç sınaşa.
Bikä Timerova. .
