Älfiä xanım Bötendönya Tatar kongressı citäkçelegenä cılı qabul itüläre häm metodik qullanmalar, kitapları öçen tirän räxmätlären belderä.
Ölkädäge 23 awıl rayonınıñ öçesendä rayon başlıqları bulıp tatar keşeläre eşli. Şulardan barı tik Çınlı rayonı başlığı Xanäfi Ramazanov qına üz urınında qalır kebek. Gubernator Sergey Morozov Yaña Malıqlı rayonı başlığı Mansur Bakusevqa poselenielär wäkillären rayon Sovetına saylawdan üz kandidaturasın aluın täqdim itkän. Ä rayon başlığın bu wäkillär barı tik üzläre arasınnan ğına saylıy alalar.
İske Qulatqı rayonı başlığı Färit Sanjapovqa qarata höcüm astan oyıştırılğan bulıp çıqtı. Ölkäneñ töp räsmi basması “Narodnaya gazeta” tulı ber säxifäsen Sanjapovnı faş itügä bağışlağan. Andıy ike yazma bastırılğan: berençese – saylawda qatnaşırğa telägän kandidatlarnıñ ölkä başlığına möräcäğäte. Anda rayon başlığınıñ saylaw turındağı qanunnı bozuları taswirlana häm Morozovtan rayondağı säyäsi kierenkelekne yomşartuda yärdäm sorala.
İkençe yazma “Bolay yäşäw mömkin tügel”, dip qıçqıra. Färit Sanjapov isemenä yazılğan açıq xat - anıñ qıñğır eşläre, buldıqsızlığı turında. Andıy faş itülärgä bäya birü – xäbärçe eşe tügel. Läkin xättä ğäcäplänerlek närsälär dä bar. Menä berse genä. Vladimir Şamanov üz waqıtında rayonnı Elektrosvyaz'', Salım inspeksiäse, Saqlıq bınqınıñ rayon filialı, Rayon kassa üzäge kebek rayon öçen hawaday kiräk närsälärdän mäxrüm itkän ide. Baqsañ, xäzer bolar öçen dä Färit Sanjapov ğäeple ikän. Yuğisä, ul Cirle tatar avtonomiäseneñ soñğı Qorıltayında – xalıq aldında Şamanovtan bu xatasın tözätüne räsmi räweştä sorağan ide.
Mondıy “qazınularnıñ” tamırları turında farazlar qorırğa ğına qala. Arada älege xatlarnıñ östän oyıştırılğan buluı turında yämsez farazlar da işetelgäli.
Faraz – faraz ğına inde ul. Ä menä Räsäy şartlarında qanunlıq töşençäseneñ ÜZENÇÄLEKLÄRE ğomum mäğlüm. “Simbirskiy kur''yer” gäzitendä mäğlüm keşe – elekke Minatom ministrı Adamov häm anıñ “uñ qulı” bulıp torğan Valentin İvanovnıñ qıñğır ğamälläre turında tännärne öşeterlek yazma birelgän. İvanov – Semberneke. Elek - NİİAR (Atom reaktorları fänni institutı) direktorı, xäzer isä – Sember ölkäsennän Däwlät Duması deputatı. “Simbirskiy kur''yer” äytüençä, Sember ölkäsen atom çüplegenä äyländerü turındağı qanun da säyer qabul itelde. Başta deputatlarnıñ 90 protsentı qarşı ide, kötmägändä qanun şoma ğına qabul itelde dä quydı. Häm bu gäzit Adamov belän İvanovnıñ qıñğır ğämällärennän kergän aqça näq deputatlarnı “maylawğa” kitkänder dä inde, dip yaza...
“Azatlıq” radiosı, Ayrat İbrahim, Sember.
