Accessibility links

Кайнар хәбәр

Şähri Semberneñ yawlap alınuı iskä alındı


“Watan” firqäseneñ Sember bülekçäse yıl sayın may axırında Şähri Semberneñ yawlap alınuına bağışlanğan Xäter köne uzdıra kilä. Ul 14-ğasır möselman ziratı östendä, Lenin mäydanı yanında oyıştırıla. Ğädättä, bu çara waqıtında Yarımaylı yäşel töstäge möselman bayrağı cilferdi ide. Bu yulı – yuq. Çönki älege matäm çarası waqıtında şuşı urın aşa Tärele yörü uzaçaq ikän. Nail Mikeev bayraqnı törep quyarğa mäcbür buldı.

Çarada 30 çaması ğına keşe qatnaştı. Elekke yıllarda yözläp sanalğan çaqlar da bar ide. Başta Sember qalasın yaqlawda şähit kitkän babaylar ruxına yäsin uqıldı. Soñnan törle borçığan närsälär turında fiker alıştılar. Berse turında täfsilläbräk. “Tuğan tel” oyışması räise Mäxmüt Xäyrullin ölkä Prokuraturasınnan kilgän cawap xatı belän tanıştırdı. “Tuğan tel” xatında “Djamaat” iseme tağılğan banditlar törkeme turındağı şaw-şularnıñ näticäse, kemneñ nindi “vaxxabitlı” cinayät qılğanı turında mäğlümlät çaraları aşa anıq cawap sorala. Çönki vaxxabitlar törkemeneñ banditlıykları turında barısı da awız çayqağannar ide. Yustitsiä Sovetniğı Vinogradov qul quyğan “cawapta” mondıy mäğlümätlärne sudtan sorarğa täqdim itelä.

Vinogradov äfände şuşı uq xatta “Tuğan tel”neñ ikençe ğözerenä dä cawap birgän. Monısı arxitektura häykäle dip tanılğan Aqçurinnar mäçeten xosuslaştıruğa yul quyğanı öçen elekke möfti Äyup Deberdeewnı cawapqa tartu kiräklege turında ide. Bu açıqtan-açıq eşne tikşerü, nigäder, uçastok militsionerı Rifqat Xäsänevkä tapşırılğan bulıp çıqtı. Ölkän leytenant Xäsänev, mondıy aferalar cäzasız qalmas, dip ışandırğan ide. Bu yeget, tikşerü näticälären tapşırsa da, berni dä işetelmägängä, Tuğan tel prokuraturadan açıqlıq kertüne soradı. Baqsañ, ölkä üzägeneñ Lenin rayonı Eçke eşlär idäräse cinayät eşe açunı kiräk dip tapmağan, ikän.

Prokuraturanıñ cawap xatında bolay dielä: “Maynıñ 20 Prokuratura Lenin rayonı militsiäseneñ mondıy qararın yuqqa çığardı häm bu eşne yañadan tikşerügä yunältte”.

“Azatlıq” radiosı, Ayrat İrbrahim, Sember.

XS
SM
MD
LG