Accessibility links

Omski balaları “İdel” Yäşlär Üzäge oyıştırğan “Millätebez xäzinäläre” smenasında yal itäçäklär


Sovet xakimlege yıllarında balalarnıñ cäyge yalların oyıştıru ber qalıpqa salınğan ide disäk, yalğış bulmas. Ata-analar artıq borçılmıyça, mäşäqätlänmiçä genä balaların pioner lagerlarına ozatalar ide. İldä xakimlek üzgärep, yal itü sistemaları tarqalğannan soñ, balalarnıñ yalların oyıştıru şaqtıy qatlawlandı. Şulay da soñğı yıllarda bu eş berniqädär cayğa salına başlandı . Ata-analar eşlägän predpriätielär balalar öçen cäyge sawıqtıru lagerları oyıştırıp, yal itü mömkinlekläre tudırırğa başladılar. Tatar balalarınıñ cäyge yalların oyıştıruda Tatarstannıñ da yärdäme bula başladı.

Rusiäneñ törle töbäklärendä yäşäwçe balalarğa Tatarstan cirendä yal itü mömkinlegen Qazannıñ “İdel” Yäşlär Üzäge dä tudıra. Älege üzäk oyıştırğan yal lagerlarına Omskidan da baralar. Omski tatar milli mädäni möxtäriätenä bıyıl älege üzäk oyıştırğan 3 törle yal urınına çaqıru kilde. Ämma möxtäriätneñ bu eş öçen cawaplı bulğan yäşlär bülege törkem tuplaw östendä citärlek eşlämäde, törkemnär tuplanmadı. Döres, yal waqıtı başlanırğa az könnär qalğaç qına, möxtariätneñ başqa yunäleştä eşläwçe aktivistları törkem tuplaw eşenä kereştelär häm qısqa waqıt eçendä “Tatar yäşlär könnäre”nä baru öçen - 6, “Millätebez xäzinäläre” smenasında yal itü öçen - 2 balanı äzerlädelär. Tatar yäşläre könnärenä baruçılar iyül ayında ğına yulğa çığarğa cıyınsalar, “Millätebez xäzinäläre” smenasına baruçı balalar inde Qazanğa yul tottılar. 14 yäşlek Rişat belän 13 yäşlek Ğamiläneñ äti-änise balaların ozatqanda dulqınlansalar, borçılsalar da, alarınıñ Qazanğa barularınnan qänäğät idelär.

Şulay itep, bıyıl “İdel” üzäge tarafınnan töbäklärdän yal itärgä kilüçe balalar sanı qatği çiklänmäsä dä, 50 meñ tatar yäşägän Omski ölkäsennän Tatarstan belän tanışırğa 8 genä bala baraçaq. Monı inde ölkä möxtäriäte eşçänlegeneñ uñay kürsätkeçe dip äytep bulmıy. Saniä Mirxaleewa. Omski

XS
SM
MD
LG