16 iyül könne Krasnoyarski şähäreneñ tarixi-mädäni muzeenda Evenkiädä, Taymırda häm Krasnoyar kraenda yäşäwçe tatarlarnıñ berençe qorıltayı bulıp uzaçaq. Töbäk külämendä berençe märtäbä oyıştırılaçaq bu cıyınğa kraynıñ awıl-rayonnarınnan häm qurşe töbäklärdän 150 gä yaqın delegat kilüe kötelä.
Qorıltayda asılda 2 soraw qaraw küzdä totıla. Alarnıñ berse - kray tatarlarınıñ ictimaği oyışmasın tözü, ikençese - tatarlarnıñ üseş konsepsiäsen buldıru, alda torğan maqsatlarnı häm eş ısulların bilgeläw.
Qorıltay ütkärüneñ töp maqsatı - eşläp kilüçe tatar oyışmalarnıñ eşçänlegen aktivlaştıru, yaña oyışmalar tözü, milli mädäniätne saqlaw häm üsterü buyınça alıp barılğan eşkä tizläneş birü, tatar xalqınıñ sotsial' torışın yaxşırtu häm bu eştä cirle eşmäkärlärne kübräk cälep itü, Tatarstan belän bäyläneşlärne nığıtu.
Qorıltaynıñ eşe 1 genä köngä isäplängän bulsa da, anda mädäni programma da qaralğan. Cirle tatarlarnıñ tarixı turında törle dokumentlar, kiem-salımnar, milli rizıqlar quyılğan kürgäzmälär oyıştırılaçaq. Krasnoyarski, Lesosibirski häm Jeleznogorski şähärläre icat kollektivlarınıñ çığışları da kötelä.
Qorıltay niçek ütär, quyılğan maqsatlarğa ireşelerme - aldağı çığışıbızda täfsilläp söylärbez.
Saniä Mirxaleeva. Omski.
