Başqortstannıñ İşembay şähärendä häm rayonında comğa könne mäğärif xezmätkärläreneñ respublika kiñäşmäse bulıp ütte. Yıl sayın uqu yılı aldınnan bula torğan şuşı august kiñäşmäsendä bıyıl da respublikanıñ yuğarı citäkçeläre qatnaştı. Prezident Mortaza Räximov, Başqortstan Däwlät Cıyılışı Qorıltay räise Qonstantin Tolkaçev, premyer-ministr Rafael Baydäwlätov, şulay uq rayonnar häm şähärlär xaqimiätläre başlıqları, ministrlar, rayonnar häm şähärlärneñ mäğärif idaräläre citäkçeläre könneñ berençe yartısında İşembay rayonınıñ Qanaqay, Salix, Äxmär, Qarayğan awıllarında bulıp andağı mäktäplär eşçänlege belän tanıştı. Bu awıllardağı mäktäplär bıyıl tulısınça yañartıp qorılğan. Ä Qarayğan awılında, ğomumän dä, sotsiäl-mädäni bina açu tantanasında qatnaştı qunaqlar. Bu binada başlanğıç mäktäp tä, meditsina punktı da, kitapxanä dä, balalar baqçası da urnaşaçaq.
Töştän soñ respublika mäğärif kiñäşmäsendä qatnaşuçılar İşembay şähärendä plenar utırışqa cıyıldı. Anda prezident Mortaza Räximov häm başqa citäkçelär, şulay uq mäğärif ölkäse xezmätkärläre çığış yasadı. Mortaza Räximovnıñ çığışında «här millät balası üz ana telendä belem alırğa häm ana telen öyränergä mömkinlek alırğa tieş» digän fiker assızıqlandı. Şuşı uq fikeren prezident yañaraq Ufadağı 65 nçe sanlı tatar gimnaziäsendä bulğanda da yañğıratqan ide. Anda ul gimnaziäneñ yaña binaları tözeleşe belän tanışu öçen bardı. Respublika citäkçeseneñ «här bala üz ana telen öyränergä mömkinlek alırğa tieş» digän süzläre altınğa tiñ, älbättä, häm moña cawap itep «awızıña bal da may» dip kenä äytäse kilä. Läkin respublikada başqort teleneñ östenlek ala baruı, ä başqa tellärneñ, bigräk tä tatar teleneñ qısrıqlanuı küzätelä. Ä inde Başqortstan parlamentı deputatlarınıñ cäyge yallarına kitär aldınnan ütkärgän soñğı utırışlarında «Mäğärif turındağı qanun»ğa tözätmälär kertüe häm anda Başqortstandağı barlıq millätlär wäkilläreneñ dä mäcbüri räweştä başqortça uqırğa tieş buluları xaqında äytelüe respublika prezidentınıñ altın süzläreneñ bäyäsen töşerä. Soñğı könnärdä respublikanıñ tatar awıllarındağı mäktäplärdä ata-analardan balaların başqortça uqıtuğa rizalığın alğan, qultamğalar quydırılğan isemleklär dä tözelä ikän, digän xäbärlär taraldı. Yaqın könnärdä «Azatlıq» xäbärçeläre, şuşı xäbärlärneñ döreslegen tikşerü öçen, rayonnarğa çığarğa cıyına. Niçek kenä bulsa da, Başqortstanda süzdä ber, ğämäldä ikençe törle xällär mäğärif ölkäsendä dä çäçäk ata.
