Qazannıñ meñ yıllıq tantanaların 1150 jurnalist yaqtırtaçaq. Şularnıñ 180 çit il qäläm ähelläre. 450 tatarstanlı, qalğannarı Rusiä töbäklärennän bula. Qazan älegä xätle monıñ qädär jurnalistnı ber waqıtta kürgäne yuq ide. İnde, xäzerdän ük, Tatarstan başqalasında küp kenä çit il jurnalistları eşli. Mäsälän, bu könnärdä, Çexiäneñ ber TV kanalı Qazan turında programma töşerü belän mäşğül. İsegezgä töşeräbez, Qazannıñ meñ yıllığın raslawda, arxeologlarnıñ Qazan Kirmänennän tapqan çex täñkäse zur rol' uynağan ide. Qazan tantanaların yaqtırtırğa cıyılğan jurnalistlar qunaqxanälärdä genä tügel, ä İdel yarında, ike teploxodta da yäşäyäçäk.
