Mäskäw tamaşaçısı 13 yäşlek, skripkada osta itep uynawçı Arslan Säyfine berençe tapqır milli üzäktä, ikençe tapqır Qazannıñ meñ yıllığına bağışlanğan Rossiä konsert zalında uzğan zur konsertta alqışlarğa kümgän ide. Şuşı könnärdä Arslan Säyfi Germaniädän, Gamburg muzıka akademiäse Kloster Şantaldä uzdırğan xalıqara skripkaçılar konkursınnan berençe urın alıp qayttı. Arslan tumışı belän Qazannan. Başlanğıç muzıka belemen dä Tatarstanda alğan. Xäzer inde ikençe yıl Mäskäw konservatoriäse qarşındağı muzıka mäktäbendä uqı. Arslan skripkaçılar öçen oyıştırıla torğan konkurslarda 2000 yıldan birle qatnaşıp kilä. Anıñ öçen zur borılış yasağan konkurs 2002 yılda Orenburda ütkärelgän Rastropoviçlar isemendäge konkurs bulğandır disäm hiç yalğış bulmas. Ul bu konkursta ul Gran priğa layıq bulğan. Häm anı anda Mäskäw konservatoriäse professorı Eduard Graç häm Mstislav Raspropoviç bik yuğarı bäyälägännär. Şul konkurstan soñ Eduard Graç anı Mäskäwgä çaqırğan da.
Arslan Säyfi yaña isemnär fondı stepindiatı da. 2003 yılda anı Dawid Oystrax isemendäge stependiä belän dä büläklägännär. Älbättä ul stependiälärneñ isemnäre bik yañğırawıqlı bulsa da, aqça bularaq küp tügel. Mäskäwgä belem estäp kilgän Arslan belän änisen berençe könnärdä tanışları sıyındıra. Läkin könnärdän berkönne alar çemodannarın totıp uramda qalalar. Menä şul waqıtta alarğa Mstislav Rastropoviç fondı yärdäm qulın suza. Fatir tabıp birälär, ay sayın aqçasın da alar tüli. Xattä konkurslar öçen dä yärdämçelärne alar taba. Läkin yärdämçelär arasında ber genä tatar keşese dä yuq. Uynar öçen sıyfatlı skripkanı Arslanğa Alena Bayıva isemle Mäskäw konservatoriäse studentkası büläk itkän. Çönki Bayıva üze inde Stradivari skripkasında uynıy başlağan. Şuşı büläk skripqa belän Germaniädä berençe urınnı alğan da inde Arslan. Ägärdä Kloster Şvantaldä ütkärelgän konkursta 21 ildän kilgän talantlı skripkaçılar qatnaşuın häm ul illär arasında Yaponiä, İtaliä, Portuğaliä, Anliä, Qıtay häm başqa illärneñ buluların äytsäk, Arslanğa bik yaxşı uynarğa kiräk buluın küz aldına kiterergä bula. Berençe urın östenä ul äle virtuoz iñ osta uynawçı isemenä dä layıq bulğan. Bu xaqta diplom da birgännär.Min Arslan häm anıñ änise Mädinä xanım belän oçraşıp, konkurs turında da tormışları xaqında da soraştım.(audio).
Yazmanı “Azatlıq” radiosı öçen Näzifä Kärimova äzerläde
