Menä niçä kön inde ber ük tema xaqında ike yaqtan zur qızıqsınuçanlıq belän fikerläşälär. Rusiäneñ Üzäk telekanalları Putinnıñ byudjet xezmätkärläreneñ eş xaqın berniçä tapqırğa arttıru turında optimistik rux belän söyli. Ä xalıq, cämäğätçelek, ışanırğamı, ışanmasqamı diep, mökibbän xälendä.
Rusiä Prezidentı V.V. Putinnıñ byudjet ölkäsendä eşläwçelärneñ xezmät xaqın arttıru turındağı proyekt – täqdimnäre belän Qazan däwlät universitetı xezmätkärläre dä xäbärdar.
Filologiä fännäre kandidatı, Qazan däwlät universitetınıñ tatar jurnalistikası kafedrası assistentı Rezidä Zäyni:
“Xezmät xaqın arttıru turındağı xäbärlärne bez yılına berniçä tapqır kötep torabız. Qızğanıçqa qarşı, inflyatsiä belän ul xezmät xaqı kütärelü sizelmi. Öç yıl eçendä fänni xezmätkärlärneñ xezmät xaqın 30 meñ sumğa citäçäk digän süz dä äytelgän ide. Döresen genä äytkändä, bu xäbärne häm anıñ döreskä çığuın bez küptännän kötkän idek. Monıñ tormışqa aşuı älbättä şik tudıra. Ä menä ğädäti 11% xezmät xaqın arttıru turındağı mäs’älägä kilgändä, ul bälki artır, ämma ul sizelmäs. Bügenge bäyälär artu barışında yılına ike – öç tapqır tügel, ä bälki ay sayın xezmät xaqı artıp torsa zıyan itmäs ide.”Filologiä fännäre doktorı, professor Wasil Ğarifullin:
“Bu bik quanıçlı berençe qaraştan uq, çönki sotsial' yaqtan iñ yaqlanmağan ölkä – ul byudjet ölkäse. Putinnıñ wäğdäse alarnıñ statusın tieşençä bäyäläw häm matdi yaqtan tieşençä tä'min itügä yunälderelgän. Bolay Putin üzen real' wäğdälär birüçe säyäsätçe itep kürsätte. Häm şuña kürä min anıñ tormışqa aşuina hiçşiksez ışanam. Läkin bu mäs’äläneñ ikençe yağı bar. Menä bu Putin yäki xökümät birä başlayaçaq şaqtıy zur aqçalarnı inflyatsiä aşap beterergä mömkin, çönki byudjet ölkäsendä eşläwçelär bik küp häm alarnı sotsial' yaqtan yaqlaw öçen aqça bülep birü näticäsendä hiçşiksez sumnıñ (rubl'neñ) bäyäse oçsızlanaçaq, bu inflyatsiägä kiteräçäk”. Elektron massaküläm mäğlümat çaralarınıñ teoriä häm praktika kafedrasınıñ uqıtuçısı Mörşidä Cihan:
“Xalıq närsä söyli, şuña ışanırğa kiräk. Xalıq äytsä, xaq äytä. Uqıtuçılarnıñ xezmät xaqın küptän arttırırğa kiräk ide. Bügenge köndä bezneñ xezmätebez bik az. Mäsälän, min Qazan däwlät universitetlıda 11 razryad buyınça 3000 sum tiräse aqça alam. Bu aqçağa nişli alam inde min? Xäyerçelek bit inde bu. Min üzebezneñ Tatarstanıbıznı xäyerçe dip sanamıym, şundıy bay neft' yatmaları bulğan däwlättä bez uqıtuçılar xäyerçelektä yäşibez. Bu döres tügel älbättä, şuña kürä nindi dä bulsa üzgäreşlär bulsa bik yaxşı bulır. Bulmasa da bez bernärsä dä eşli almıybız. İkençe eştä, öçençe eştä menä şulay äkren genä eşläp yöribez.”Çınnan da bu xäl ütälerme, eş xaqları berniçä tapqırğa artırmı? Ägär dä mondıy yañğırawıqlı wäğdälär tormışqa aşmasa, küp kenä keşelärneñ böten ışanıçı çelpärämä kiläçäk. Bäxetle könnär citügä nibarı 110 kön qaldı.
Gölnaz Şäyxetdinova.
