Accessibility links

Tömän Qazannıñ 1000 yıllığın bäyräm itte


Qazannıñ 1000 yıllığı bäyräme Tömändä dä ütte. 22 nçe sentäber könne bu tamaşanı qararğa sirkqa 1800 keşe cıyıldı. Alarnı işek töbennän ük milli kiemnär kigän qızlar çäk-çäk belän qarşı aldı. Sirknıñ foyesında milli rizıqlar tezelgän, parı çığıp torğan samovarlar quyılğan çäy öställäre yanınnan da berkem dä bitaraf qına ütep kitä almadı. Meñ yıllıqqa bağışlanğan suvenirlar, audio-wideo tasmalar, milli kiemnär tezelgän säwdä öställäre yanında da xalıq küñelenä xuş kilgänen satıp aldı.

Tamaşa näq Tuqayça, «Cikterep par at, Qazanğa tup-turı kittem qarap...” digän süzlär belän başlanıp “Tuğan tel” cırı belän tämam buldı. Şuşı 3 säğät eçendä Tömän artistları qızıl başlı sölgelär belän bizälgän atnıñ arbasına utırıp äle yaña ğına 1000 yıllığın ütkärgän Qazan şähären qararğa kittelär. Ä Qazan artistları: Färidä belän Alsu “Chevrolet”ğa utırıp, “Qazan yegetläre” isä baykerlarnıñ mototsiklına töyaleşep Tömändäge bäyrämgä kilde. “Xäräkättä bäräkät” digän leytmotivqa qorılğan bu tamaşa waqıtında säxnägä kürenekle cırçılar Röstäm Zakirov, Zöfär Xäyretdinov belän bergä Tömän tamaşaçılarına yaxşı tanış cirle artistlar da çıqtı. Qararğa kilüçelär Qazan xanbikäse Söembikäne dä kürä aldılar. Bu obraznı Gölzadä Säfiullina tarixtan çınbarlıqqa qaytardı. Bötendönya tatar xatın qızlar oyışması “Aq qalfaq”nıñ citäkçese Kämäriä Xämidullina Tömändäge xatın-qızlar oyışması başlığı Bibinur Sabirovağa “Söembikä beläzegen” tapşırdı.

Tömändäge Qazannıñ 1000 yıllığı bäyrämenä kilgännär Sirk gömbäzenä asılğan ekran aşa ğına bulsa da Tatarstan başqalasınıñ iñ matur urınnarına säyäxät ittelär. Mintimer Şäymievneñ: “Bez Buldırabız”,- digän süzlären işettelär. Vladimir Putinnıñ tatarça söyläwen tıñladılar.

Moña qädär Sabantuylardan qala, bina eçenä şulqadär küpsanlı millättäşneñ cıyılğanı yuq ide. Bu çara waqıtında arenağa çıqqan Sirk mödire Färzänä Xälilova: “Minem küñelemä tıñğılıq birmägän zur xıyalım tormışqa aştı. Tözeleş tämam bulğaç, sirkta millättäşläremä büläk itep ber kiçä ütkärermen, dip xıyallanğan idem. Bu tamaşadan soñ min üzemne bik bäxetle keşe itep sizäm”,- dide.

Mixerbanlı tamaşaçı bu çaranı üz qanatı astına alğan Bötendönya tatar kongressınıñ başqarma komitetına da, Tömän şähäre tatarlarınıñ milli mädäni avtonomiäsenä dä, “Miras” xäyriä fondına da zur räxmäten belderep taralıştı.

Nail Alan. Tömän.

XS
SM
MD
LG