Atom reaktorları buyınça fänni-tikşerü institutında (NİİAR) Atom qaldıqların kümü poligonın qullanu buyınça xalıqara seminar uzdı. Anda NİİARnıñ uñay täcribäse xuplandı. Läkin başqa fiker yörtüçelärgä süz birelmägän.
“Grajdannar initsiativasına yärdäm üzäge” Sovetınıñ räise Aleksandr Piskunov äytüençä, ağulı sunıñ cir astına köçläp tutırıluınıñ ber genä dä zararı yuq, häm mondıy ısul dönyada iñ aldınğı, kamil dip sanala digän fikergä kilgännär. Baqsañ, Qazannıñ “SNİİgeolneruda” isemle fänni institutı tikşerüläre buyınça, anıñ belgeçläre bötenläy başqa näticä yasağannar. Kosmostan töşerelgän räsemnär şuşı tirädä cir qabığı yarıqları çeltäre päyda buluın kürsätälär. Dimäk, alar aşa asqa tutırılğan ağulı sıyıqlıqlar öskä çığaçaq.
Xäzer başqa illärdä mondıy ısul bötenläy qullanılmıy. Äytik AQŞnıñ Okridj (Okric) atom üzägendä elegräk cir astına şulay tutırılğan sıyıqlıqnı suırıp alıp kipterälär ikän. MAGATE da 1996-yılda uq mondıy kümü ısulın qullanmasqa täqdim itkän. Räsäydä äle 3 cirdä qullanıla, di: Tomski ölkäsendä, Krasnoyar kraenda häm Mäläkästä. Seberdä keşe yäşämi torğan cirdä bulsa, Mäläkästä näq elektr stansası astına cibärelä. Şunnan uq 50 meñ çaması keşegä eçär su çığarıla. Biredä başlanğan çişmälärneñ İdelgä qoyğançı eçär su bulıp qullanıluın da östäp äytergä kiräk.
