Omskida inde ike yılğa yaqın tatar xäräkäte aktivistları köçe belän eşlänä häm eşmäkär Tamir äfände Alimbaev isäbenä näşer itelä torğan “Tatar dönyası” gazetasınıñ çirattağı 15-nçe sanı dönya kürde. Gazetanıñ bu sanı tulısınça diärlek Qazannıñ meñyıllıq bäyrämenä bağışlanğan. Anda “Qazan yäşi, maturlana, üsä häm çäçäk ata” digän töp baş astında bäyräm barışında uzğan çaralar turında yazılğan. Yazmalarda bäyrämdä qatnaşqan Omski delegatlarınıñ xisläre, kiçereşläre, fikerläre belderelgän. Mäqälälär bäyräm küreneşläre häm avtorlarnıñ Qazannıñ istälekle urınnarında töşkän fotoräsemnäre belän bizälep birelgän.
“Qazannıñ maturlığına soqlandım, uramnarında yördem, Kreml'dä buldım, Qol Şärif mäçetendä namaz uqıdım. Bäyräm bik yuğarı däräcädä oyıştırılğan, bar närsä dä uylanıp eşlängän. Qunaq bularaq, här adımda üzemä qarata qäder-xörmät sizdem. Mintimer Şaymievnıñ aqıllı säyäsäte Tatarstannıñ däräcäsen yuğarı tota, xoday aña isänlek-sawlıq birsen. Räxmätemne, izge teläkläremne aña häm barlıq qazanlılarğa citkeräsem kilä”, - dip yaza ölkä tatar milli-mädäni möxtariäte äğzası Raziä apa Mäcitova.
“Şundıy matur şähärne kürgänem yuq ide. Küñellärem tuldı, bäxetle xislär kiçerdem.Min härber tatar keşese ğömerendä ber märtäbä bulsa da, Qazanda bulırğa tieş dip uylıym. Min üzem, alla birsä, kiläçäktä otpuskamnı Qazanda ğına uzdıraçaqmın”, - dip xislären belderä “Tanışu” klubı citäkçese Gol'nara Makareviç.
Şulay uq Qazan belän soqlanuları, ğorurlanuları turında yazalar Bötendönya tatar kongressınıñ başqarma komitetı çaqıruı buyınça meñyıllıq bäyrämdä qatnaşqan başqa Omski delegatları da.
Gazetada bäyrämgä üzlegennän barğan omskilılarnıñ fikerlärenä dä urın birelgän. Qazanda berençe märtäbä bulğan Zölfirä, Nail häm Timur Batratdinovlar, pedagogiä kölliäte talibäläre Regina Axmetşina, İndira Tuxtametova, Yuliä häm Lena Gonçarenkolar bötendönya tatarlarınıñ märkäzenä äylängän Qazanğa baruları, izge Bolğar cirlären kürüläre belän bäxetle buluları turında yazğannar.
Gazetanıñ dini säxifä öleşe Ramazan ayına bağışlanğan, uraza totunıñ ähämiäte, mäğnäse añlatılğan. Anda Qol Şärif mäçete turında külämle genä mäqälä birelgän. Annan tış Omskinıñ üzendä dä küptän tuğel genä yaña mäçet açıluı turında yazılğan. Mäçet açu tantanasınnan fotoräsemnär urnaştırılğan.
Gazetada ölkäneñ awıl-rayonnarında häm kürşe töbäklärdä bulıp uzğan qayber ähämiätle mädäni çaralar turında da yazılğan. Balalar säxifäsendä äkiätlär häm nänilär öçen şiğerlär basılğan.
Şunı da iskä töşerep ütärgä kiräk, “Tatar dönyası” gazetası moñarçı 999 danä bulıp räsmi terkälmiçä çığarılıp, aktivistlar yärdäme belän xalıqqa taratılıp kilde. Terkälmägän gazetağa yazılu häm anı yıraq awıllarğa iltep citkerü qıyın bulğanlıqtan, gazetanıñ härber sanı da uquçılarına barıp citä almadı. Bu problemanı çişüne gazetanı näşer itüçe Tamir Alimbaev üz östenä aldı – poçta bülekläre belän kileşü tözep, gazetanı taratu oyıştırdı. Şulay itep “Tatar dönyası” gazetası, şuşı sanınnan başlap uquçılarına, xätta yıraq awıl-rayonnarda yäşäwçelärgä dä, poçta xezmäte aşa barıp citäçäk.
Saniä Mirxaleewa. Omski
