Studiä qarşında 4 - tatar tele, cır, bayu häm qul eşläre buyınça tügäräklär eşli. Däreslär atnağa ber märtäbä, yäkşämbe könne alıp barıla. Balalar tügäräklärneñ barsına da yörilär. Anda alar tuğan teldä söyläşergä, tatarça uqırğa-yazarğa , cırlarğa-biergä öyränälär, milli ornamentlar belän tanışalar. Xoreografiä tügäräge citäkçese Älfinä Şäymärdanova süzlärençä, balalar äle tatar telen naçar belälär, ämma öyränergä teläkläre zurdan. Bez - uqıtuçılar balalar belän, mömkin bulğança, tatar telendä aralaşırğa tırışabız, - di ul.
23 oktäber könne balalar studiäsen täqdir itü tantanası bulıp uzdı. Balalar anda äti-äniläre, äbi-babayları,, tuğan-tumaçaları belän kilgän idelär. Tamaşaçılar da şaqtıy ğına buldı. Balalarnı täbriklärgä şähär xakimiätennän dä kilüçelär buldı. Şunsı da kürkäm ide, balalar tantanada tatar üzägendä eşläwçe apaları tekkän milli kiemnärdä buldılar. Bäyräm barışında alar, tırışıp-tırışıp, qısqa waqıt eçendä öyrängän şiğerlären uqıdılar, cır-biyugä öyränülären kürsättelär.
Tantana barışında tatar üzäge direktorı Roza xanım Tixomirova balalarğa Tatarstannıñ sälämen citkerde häm Bötendönya tatar kongressı büläkläre – nänilär öçen näşer itelgän kitaplar tapşırdı.
Balalar bäyräme cirle mäğlümat çaralarında da yaqtırtıldı, Novosibirskinıñ däwlät radio-televidenie kanallarınıñ yañalıqlar programmalarında bäyräm turında syujetlar birelde. Annan tış bäyräm barışın tulısınça diärlek kommersiä belän şöğellänüçe 21-nçe televidenie kanalı magnit tasmağa yazıp aldı. Soñraq bu kanalda maxsus tapşıru eşläp kürsäteläçäk. Döres, 21-nçe kanalda çığa torğan tatar tapşıruları älegä asılda rus telendä alıp barıla, bälki yaña yıldan tatar telendä tapşırular äzerli başlarbız, - di bu kanalda uzğan yıl eşli başlağan Zölfiä Axmetğareeva.
Novosibirski ekrannarında cirle tatar tapşıruları bulmasa da, millättäşlärebezneñ tatar telendä tapşırular qaraw mömkinlekläre bötenläy ük yuq tügel. 21-nçe kanalda kön sayın 3-4 säğät buyına “Tatarstan yaña ğasır” programması translyatsiälänä.
Novosibirskida tağın ber tatar mäğlumat çarası barlıqqa kilde - “Azat Seber” isemle gazeta näşer itelä başladı Gazeta älegä ictimaği räweştä tatar mädäniät üzäge aktivistları köçe belän eşlänä. Çığımnarnı tulısınça diärlek iğänäçe Maksim Sabit ulı İsxakov kütärä. Gazeta älegä räsmi terkälmägän, 900 danä tiraj belän çığarıla, çığuı da daimi tügel, berençe sanı aprel' ayında dönya kürgän bulsa, ikençese şuşı könnärdä genä basmağa tapşırılaçaq. “Kiläçäktä bez anı ay sayın çığarıp torırğa tırışaçaqbız “, – di redaktor wazifasın ütäwçe Natal'ya Waleeva.
Noyäber ayında Novosibirski ölkä tatar mädäniät üzäge oyışuınıñ 15 yıllığın bilgelärgä äzerlänä. Qunaqlarnıñ geografiäse kiñ bulırğa oşıy. “Qunaqlarnı bez Tatarstannan, Başqortstannan, Qazaqstannan, seber yağı regionınıñ küp kenä şähärlärennän kötäbez”, - di tatar mädäniät üzäge citäkçese Roza Tixomirova.
Ölkä tatar üzägendä yäşlärneñ küp buluı häm alarnıñ aktiv eşläwlären dä assızıqlarğa kiräk. Yäşlär başqarası eşlären üzläre bilgelilär häm barsın da cirenä citkerep eşlilär. Tatar üzäge qarşında alar “Altın yoldız” dip isemlängän oyışma tözegännär. Anda törle yünäleştä eş alıp baralar: şähärdä yäşäwçe ölkän yäştäge tatarlarnı barlap çıqqannar, yalğızlarğa törle yärdäm kürsätü oyıştırğannar, yätim balalarğa öçen kiem-salımn uyınçıqlar, kitaplar cıyu oyıştırğannar, äyberlärne balalar yortına iltep tapşırğannar. Annan tış yäşlär küptän tügel genä möselman ziratına barğannar, qarawçısız qalğan qäberleklärne çistartqannar. “Bez märxüm bulğan millättäşlärebezne onıtmasqa tieşbez. Qäberleklärne tärtiptä totu – möselmannarnıñ izge burıçı”, - di “Altın yoldız” oyışması citäkçese Sergey Staxeev.
Ölkä tatar mädäniät üzäge dini yünäleştä dä eşlär alıp bara. Üzäk aktivistları Ramazan ayı däwamında Novosibirskinıñ cämiğ mäçetendä iftar aşları ütkärüdä bulışalar. Şunsı kürkäm, inde öçençe yıl rättän biredä uraza totuçılar öçen awız açu oyıştırıla.
Saniä Mirxaleeva. Novosibirski-Omski.
