Sverdlovski ölkäsendä 1957нче yılda uq oyıştırılğan “Yäşlek” ansamble, anıñ alıştırğısız citäkçese Wäcit ağa Zinnurov layıqlı yalğa çıqqannan soñ, beraz eşen tuqtatıp torğan ide. Bu könnärdä quanıçlı xäbär işetelde – ansambl' tağın eşli başlağan, ul ğına da tügel, üz saflarına yäşlärne, ör-yaña talantlarnı tuplağan. Sverdlovski däwlät ölkä xalıqlarınıñ icat yortı bu eş öçen bik uñaylı zal bilgelägän, fortepyano, bayan, sintezator kebek muzıkal instrumentlar da birelgän. Citäkçe öçen yartı stavka bulsa da xezmät xaqı da bar.
Citäkçelekne üz östenä alırğa Uralda tanılğan tatar cırçısı, küptörle konkurslar lawreatı İl'dam Şärapovnı kündergännär.
Här atnanıñ yäkşämbe könendä alar bu zalğa cıyılıp, repetitsiälär ütkärälär, cırlar öyränälär.
Ansambl'neñ citäkçese İl'dam Şäripov äytüençä, biregä yörergä teläweçlär, şöker, küp. Yäşlärne tuplaw, öyrätü bik cawaplı eş. Xalıq icatı yortı tatar ansamble öçen şundıy şartlar tudıra ikän, yözgä qızıllıq kiterü yaramıy. Yıl sayın ber märtäbä bulsa da zur konsert quyıp, üzeñne kürsätergä dä kiräk. Ämma eş konsertta ğına tügel, dip sanıy İl'dam äfände. Yäşlärneñ biregä yörüe, çın küñeldän tatar cırına öyränergä omtıluları qäderle.
Yäşlär arasınnan 18 yäşlek Liliä Sarwayıva, 16 yäşlek Yelena Märdämşina, 21 yäşlek Wadim Fazletdinov ayıruça ayırılıp toralar. Şähärdä tuıp üssälär dä, tatarça yarıysı ğına söyläşä belüläre belän dä quandırdılar äle. Qızlar muzıka mäktäben betergännär, rus ansamblenä yörgännär. Tatar cırına mäxäbbät ğailä tärbiäsennän kilgän. Ansambl'gä yöri başlawların tatar moñın tirännän öyränäseläre kilü belän añlatalar.
Ansambl'dä qatnaşuçılar arasında inde biregä küptännän yörep, xalıq arasında tanılıp ölgergän cırçılar da bar. Şular arasınnan Zölfiä Möbäräkşina bu yıl üzeneñ ille yıllıq kürkäm yubileyın uzdırırğa cıyına. Ansambl'gä yöri başlawına un yıl. “Biredä cırlıybız, yäşlär belän aralaşabız, yäşlek iskä töşä, ğomumän yäşäräbez!”- di ul
“Yäşlek” ansamble şulay gel yäşärep torsın ide dip telilär biregä yörüçe olıraqlar. Ural cirendä inde ille yılğa yaqın eşläp kilgän tatar ansambleneñ ğömere ozın bulsın.
Fäwiä Safiullina,Yekaterinburg
