Respublikanıñ Yuğarı mäxkämäse “şpionlıq” eşen qarıy başladı. Ğäyeplänüçe — Başqortstanda Fännär akademiäsen oyıştıruçı häm anıñ berençe prezidentı Äskär Kaybışev. 66 yäşlek ğalim çit ilgä qanunsız yaña texnologiälär satuda ğäyeplänä. Eş şunda, ul Könyaq Koreyägä titan eremäse quşılğan timer citeşterü texnoloğiäsen satqan bulğan. Koreya yağı anı maşina tägärmäçläre disqı yasaw öçen faydalanır öçen aluın beldersä, iminlek xezmäte aerokosmik plannarın tormışqa aşıru öçen dip isäpli. Mäxkämä 12nçe üktäbr ük başlanırğa tieş bulsa da, ul küçerelep kilde. Säbäbe — Kaybışevnıñ üpkäläre qabaruda. Ğalim cinayät eşe belän tanışqan bülmädä iminlek xezmäte tartıp alğan 400 kilogramm marixuana saqlanğan bulğan. Kaybışev awıru säbäben şuña allergiä belän añlatsa, iminlek xezmäte ğälim monı maxsus quyırta dip isäpli.
Äskär Kaybışev “ikelätä texnologiä” digän oçraqnı añlatunı sorap, Rusiäneñ Konstitutsiä mäxkämäsenä möräcägät itte. “İkelätä texnologiä” şuña — ul satqan timer tınıç maqsatlarğa citeşterüdän tış xärbi ölkädä dä qullanıla ala. Kaybışev bu texnologiäneñ ser bulmawın, anıñ turında çit il jurnallarında yazmalar çığuın iskä töşerä. Satuğa kileşü tözegän çorda monı iminlek häm tamojnya xezmätläre belep tä üzläre yul quyunı da atıy.
Rusiäneñ ber törkem keşe xoquqları buyınça oyışma citäkçeläre Kaybışevnı yaqlap Rusiäneñ Yuğarı mäxkämäsenä möräcägät künderde.
