Mäğlüm buluınça, atnakiç könne Tübän Novğorod şähärendä İdel buyı federal okrugına kergän töbäklär cämägätçelek oyışmaları wäkilläreneñ töbäkära konferensiäse bulıp ütte. Anda Rusiä İctimaği palatasın oyıştıru mäsäläläre qaraldı häm töbäklärdän şul palatğa kerü öçen däğwaçılar saylap alındı. Aldan uq bilgele buluınça, älege konferensiä delegatları Rusiä İctimaği palatasına İdel buyı federal okrugınnan cämğıse 10 kandidat saylap alırğa häm täqdim itärgä tieş ide. Däğwaçılarnı saylap alu ciñeldän bulmağan, çönki İdel buyı federal okrugınıñ 15 töbägennän konferensiädä qatnaşqan yegermeşär keşe arasınnan saylap alırğa turı kilgän. Başqortstannan barğan yegerme delegat arasınnan respublika Hönär berlekläre federätsiäse räise Ämirxan Sämirxanov kandidaturasına tuqtalğannar.
Ämirxan Sämirxanov yegerme yıldan artıq inde Başqortstan Hönär berlekläre oyışmasın citäkli. Säyäsi häm ictimağıy eşlärdä bay täcribä tuplağan şäxes. Ämma äle Tübän Novğorodta saylanu ğına Ämirxan Sämirxanovqa Rusiä İctimaği palatasına kerü xoquğın birmi. Tübän Novğorodta saylanğan däğwaçılar kiläçäktä Mäskäwdä tağın ber iläk aşa ütärgä tieş. Anda inde İdel buyı federal okrugınnan nibarı 6 keşe genä saylap alınaçaq Rusiä İctimaği palatasına. Şulay da küp säyäsätçelär fikerençä, Rusiä ictimaği palatına Başqortstan belän Tatarstannan saylanğan däğwaçılar motlaq ütärgä tieş. Çönki şuşı ike quätle häm zur töbäktän İctimaği palatğa wäkillär ütmäw säyäsi yaqtan da, başqa küzlektän dä döres bulmas ide.