Omski ölkäseneñ Tara şähärendä küptän tügel genä programması asılda alqıbıznıñ borınğı cırlarınnan torğan konsert-kiçä bulıp uzdı. Kiçäne rayon mädäniät bülege qarşında eşläwçe “Nur” ansamble aktivistları yaqtaşları Färzänä xanım Kuleevanıñ Tarağa kilüe uñayınnan oyıştırdılar. Färzänä xanım Tarada tuıp üskän, biredä 8-nçe sanlı tatar mäktäbendä uqığan. Urta mäktäpne tämamlağannan soñ yuğarı belem alırğa Tatarstanğa kitkän. Qazan däwlät universitetına uqırğa kergän, anı tämamlağannan soñ Qazanda qalğan häm anda 50 yılğa yaqın uqıtuçı bulıp eşlägän. Xäzer ul layıqlı yalda. Tuğan yaqlarına, yış bulmasa da, qaytıp yöri. Tarada bulğan çağında ul, tatarlar arasında çaralar oyıştıruda qatnaşa. Monnan 6 yıl elek kilüendä, Färzänä xanım klasstaşları belän oçraşu oyıştırğan ide. Anıñ qatnaşlığında çaralar bulıp toru säbäple, Färzänä xanımnı Tarada yaxşı belälär. äzerge kilüendä ul “Nur” ansamble belän berlektä cır kiçäse oyıştırdı. Kiçägä Färzänä xanımnıñ dusları-tanışları ğına tügel, tamaşaçılar da küpläp kilgän idelär. Älege çara ğadi konsert räweşendä genä barmadı, anda xalıq belän aralaşu, söyläşü dä buldı. Färzänä xanım yaqtaşların Tatarstan, andağı tormış belän tanıştırdı, Qazannıñ meñyıllıq bäyräme turında söyläde, xalıqqa küñel türlärendä yörtkän cır – moñnarın büläk itte. Ğomumän, kiçädä cılı atmosfera xökem sörde. Şunsı da iğtibarğa layıq, kiçädä ölkännär genä tügel, yäşlär dä küp buldı. Alar öçen Färzänä xanımnıñ Tarada uqığan yılları turındağı xätiräläre ayıruça qızıqlı toyıldı. Çönki yäşlärneñ kübeseneñ Tarada qayçandır tatar mäktäbe eşläwe turında işetkäne dä bulmağan ikän.
Konsert tämamlanğannan soñ, aralaşu iğänäçelär yärdäme belän äzerlängän çäy östäle artında däwam itte. Biredä dä telägän härber keşe qatnaşa aldı. Şunsı da kürkäm buldı, töp iğänäçe bulğan Näfisä häm Safual İşmuxametovlar oçraşu kiçäsenä kilgän ölkän yäştägelärgä tatlı büläklär dä äzerlägän idelär.
Ber uñaydan, İşmuxametovlar ğailäse belän dä tanıştırıp kitü urınlı bulır. Mäktäptä 20 yıl rus tele uqıtuçısı bulıp eşlägän Näfisä xanım, şulay uq ozaq yıllar injener bulıp eşlägän Safual äfände 2003 yılda Taranıñ yabılıp, taşlandıq xälgä kilgän ikmäk zavodın satıp alğannar. Qısqa waqıt eçendä anda ikmäk peşerüne cayğa salıp cibärgännär. Berazdan biredä peçenye, prännek, tort kebek tatlı rizıqlar da citeşterä başlağannar.
“İşmuxametovlarnıñ produktsiäläre yaxşı sıyfatı , tübän bäyäse belän başqalarnıqınnan otışlı ayırılıp tora”, - di tatar xäräkäte aktivistı Lyutsiä xanım Qoldaşewa.
Şunı da assızıqlarğa kiräk, ikmäk zavodında eşläwçelärneñ kübese tatarlar. “Qullarında töple eş bulu - ul millättäşlärebezneñ tormışı yaxşı, millätebezneñ kiläçäge ışanıçlı bulu “, - dilär İşmuxametovlar.
Alarnıñ ikmäk zavodı äle üseş xälendä bulıp, küp çığımnar tälap itsä dä, İşmuxametovlar iğänäçelek belän şöğellänergä dä mömkinlek tabalar: balalar häm qartlar yortlarına, küp kenä moxtaclarğa häm tatar xäräkätenä härdaim yärdäm kürsätep toralar.
Saniä Mirxaleeva. Omski
