Bügenge köndä Omski ölkäsendä törle milli oyışmalarnıñ, şul isäptän tatar möxtäriäteneñ dä eşçänlege berniçek tä finanslanmıy disäk, döres bulır. Finanslaw yäisä başqaça yärdäm kürsätü küp oçraqta cirle xakimiätneñ mömkinlegennän, tögälräk äytkändä, telägennän tora. Monnan 9 yıllap elek Omski ölkäsendä milli oyışmalar eşçänlegenä metodik yärdäm kürsätü maqsatı belän “Seber” töbäqara milli mädäni-sport berläşmäse yäğni “Duslıq yortı” buldırılğan ide. Ämma bu struktura üzeneñ eşen millätara ğomum çaralar ütkärügä yünältte. Döres, maqsatlı programma buyınça yılğa ber märtäbä bulsa da ayırım ber millät öçen nindi dä bulsa ber çara da oyıştırıla. Mäsälän, tatarlar öçen sabantuy, qazaqlar öçen näwrüz, ruslar öçen maslenitsa häm başqa şundıy bäyrämnär.
Soñğı yıllarda oyışmalarnıñ eşçänlege öleşçä bulsa da tağı ber yul belän finanslana başlandı. Bu - ictimaği oyışmalarnıñ maqsatlı programmaları buyınça grantlar konkursında qatnaşuı. Düşämbe könne mädäniät ministr urınbasarı Aleksandr Remizov milli oyışmalar citäkçelären utırışqa cıydı. Anda süz yıl axırına qädär yazıp tapşırılırğa tieşle grantlar proyektları turında bardı. Grantlar konkursı komissiäse äğzası Oleg Kolokolov süzlärençä bıyıl grantlar öçen birelgän summa bermä-ber artqan häm 1 mln rubl'ne täşkil itä.
Kolokolov: Grantlar 50-şär meñ rubl', 10 nominatsiä bulaçaq, här nominatsiädä ike ciñüçeAnnan tış bu utırışta milli oyışmalarnıñ maqsatlı programmaların ğämälgä aşıru öçen “Duslıq yortı”na da 1 mln rubl' aqça bülep birelüe bilgele buldı. Utırışta qatnaşqan oyışmalar citäkçeläreneñ küpçelege eşneñ şulay quyılışı belän kileştelär häm grantlar yazu östendä inde eş baruı turında belderdelär. Ölkä tatar milli-mädäni möxtäriäte räise Xaqim Sadıykov “Duslıq yortı”na bilgelängän summanı turıdan turı milli oyışmalar xacätenä bülep birergä digän täqdim belän çıqtı. Ämma mondıy täqdim mädäniät ministrlığı tarafınnan qabul itelmäde, bilgelängän summa byudjettan maxsus matdä buyınça cibärelä häm bez anı üzgärtä almıybız dielde.
Östäp şunı äytergä kiräk, tatar möxtäriäte citäkçelege inde berniçä yıl rättän üzeneñ eş programmaların finanslawnı häm möxtäriät urnaşqan bina öçen arenda bäyäsen byudjettan tüläwne sorap xakimiät dairälärenä möräcäğät itep qarağan ide. Ämma, yök haman da üz urınında digändäy, bu üteneçlär cawapsız qala kilde. Möxtäriät citäkçelegeneñ älege utırışta äytelgän - milli oyışmalarğa bilgelängän summanı “Duslıq yortı” aşa tügel ä turıdan turı oyışmalarnıñ üzlärenä birergä digän täqdime teläktäşlek tapmadı. Möxtäriät citäkçelegeneñ soñğı digändäy ömete dä aqlanmadı. Xaqim äfände ikençe könne möxtäriät aktivın cıyıp, alar aldında qabat arenda problemasın quydı. Şähärneñ küçemsez milek agentlığı belän tözelgän kileşü buyınça 10 dekabergä qädär burıçlar tülänmäsä binadan çığıp kitärgä turı kiläçäk, - dip kisätte häm burıçlarnı tüläwdä yärdämgä kilmägän tatarlarğa üpkäsen dä belderde.
Xäkim: 4 yılğa yaqın üzem totam, üz aqçamnı tülim. Min uylağan idem – tatarlar kilerlär,balalarnı uqıtırlar, tatar mädäniätenä öyräterlär, eşmäkärlär eş başlap cibärer... yuq, tatarlar yuq. Ayırım eşlär bara. Ägär sentnı saqlamasaq tatar eşe törle waq krujoklarğa taralaçaq... Möxtäriät aktivistları tağı ber qat bu situatsiädän çığu, burıçtan qotılu yulların ezlädelär. Qabat törle täqdimnär birep qaradılar, häm axırda tağın ber märtäbä tatar eşmäkärlären cıyıp xälne añlatırğa häm yärdäm sorarğa digän qarağa kildelär. Oçraşunıñ waqıtın noyäber azağına dip tögäl könen dä bilgelädelär. Şulay itep, möxtäriäteneñ axır çikkä citkän bu probleması xäl itelerme – älegä äytüe qıyın.
Rozaliä Sayganova, Omski
