Uzğan atnanıñ şimbäsendä Tömän ölkäse Tübäntäwde rayonınıñ Qıtkül awılındağı ike öydä qaz ömäläre görläde. Äydägez, bergäläşep başta Firdäwes apa Sadıyqovalarğa kerik äle! Qaz yolquçılar: xucabikä üze, qızları häm ber kilene barlığı 7 keşe qaysı qaya, kem läwkägä, keme eskämiägä bik caylı itep utırğan ide. Yonnarı tuzmasın dip bu eşne alar munçada başqardı. Suyıp kertkän qaznı beräw yonı yaxşıraq yolqınsın dip dımlı çüpräk quyıp ütükläp tora, qalğannarnıñ qulı-qulğa yoqmıy.
Qıtküldäge tağın ber öydä Möğazämä apada bügen qaz ömäse. Möğazämä apa Nasıyrova tuğan awılına soñğı biş yıl eçendä cäygä genä qayta. İrtägä qızı Alsu Tömängä qış çığarğa alıp kitäçäk. Şuña kürä 11 qaznı yolqışırğa, kürşe-tirä apalar da kergän ide.
Qıtkül Tömän ölkäsendäge betep baruçı awıllar isemlegendä. Äbilär betsä, qaz ömäläre belän awıl da betäçäk. Bıyılğı qışta isä barı tik 16 öyneñ genä morcasınnan töten çığaçaq. Şuşı 16 öyneñ 10 sı qaz üsterde. Küçmä qoşlar şikelle cäygä awılğa qaytıp, qışqa balaları yanına Tömängä kitep yörüçe äbilär 10 aw. Alarnıñ 4 se bäbkä satıp alıp qarap üsterde. Üzläre äytmeşli, balalarına yaña yıl tabınına büläk tä äzerläde.
Nail Alan, Tömän
