Sigez yıl elek Samarda tatar balalarınnan ğına tuplanğan “Yaqtılıq” isemle mäktäp eşli başlağan ide. Berençe yıllarda uquçılarnı awırlıq belän cıysalar xäzer inde “Yaqtılıq” ta uqırğa teläwçelärgä urın citmi. Kön tärtibenä töp binağa yanqorma tözü kiräklege kilep bastı. Ä yanqorma töp binadan zurraq bulaçaq. Älegä ölkä häm şähär qaznasınnan yanqorma öçen 35 mln sum aqça qaralğan. Bügen “Azatlıq” radiosı dulqınında yaña tözeleş turında mäktäp direktorı Xaridä xanım Daşkina belän äñgämä totabız. Xaridä xanım Daşkina söyli:
Äkren genä barsa da tözeleş alğa bara, waqıtında aqça küçermilär tözeleşkä. Yaña binanıñ diwarların balalar da, ata- analar da daimi küzätep toralar. Diwarlar öskä kütärelgän sayın quanıçıbız arta bara. Parallel' eçke eşlär dä bara.
Yaña proyekt buyınça aşxanä, sportzalı qänäğätlänerlekme, proyektqa üzgäreşlär kertäsezme?
Yaña bina böten tatarnı qänäğätländermäwe bar. Baylar küp kürgän keşelär bit. Läkin dä balalar sanı küpkä artaçaq. Xäzer 170 balağa isäplänsä, yaña binada öç yözdän kim bulmayaçaq. Proyekt tözeleş barışında üzgärä bara, tözätmälär kertelä. İsäp ike qatqa ide, inde öçençe etajnı östäwne sorıybız. Podval binanı garderobqa äyländeräçäkbez. Yanqormanıñ nigeze bik köçle, töp binanıñ da fundamentı öçençe qatnı kütärerlek.
Öçençe qatnı tözegän xäldä anda närsä bulaçaq?
Maqsatım - 400 keşe sıyarlıq säxnäle aktlar zalın buldıru. Samar tatarları öçen bu üzenä kürä ber mädäni üzäkkä äyläner ide.
Bügenge köndä mäktäpkä uquçılarmı, ällä uqıtuçılar citeşmime?
Mäktäptä uquçılarğa qıtlıq yuq. Ä menä muzıka uqıtuçısına moxtacbız, qul eşläre ostası kiräk, xoreograf kiräk.
Barlıq möğallimäläregez dä färeştälär, ä ir- at uqıtuçılar yuq. İrlärne mäktäpkä niçek kiterergä?
Mäktäpkä irlär kiräk, irlär. Fizkul'tura, fizikanı ir- at alıp barsa otışlıraq.
Yäş uqıtuçılarığız tatar telen kamil belmi, monı niçek tözätäsez?
Yäş uqıtuçılar tatar telendä naçar söyläşä. Läkin dä törle yullar belän tatar telen üzläşterü östendä eşlilär.
Aziä xalqı balaları Sezgä haman da kilälärme äle?
Kilälär, läkin dä barçasın da alıp bulmıy. Üzebezneñ tatarlarğa da urın citmi. Bik sälätle üzbäk qızları uqi “Yaqtılıq”ta.
Qırğız, üzbäk, qazax häm başqalar tatar telen teläp uqilarmı?
Ata- anaları üzläre äytep toralar. Telegez yaqın, anı öyränüe awır tügel dilär. Rus mäktäplärenä qarağanda bezne östen kürälär, çönki “Yaqtılıq”ta uqıtu sıyfatı da yaxşı, tärtip yağı da tel tidererlek tügel.
Sez “Azatlıq” radiosı dulqınında Samarnıñ “Yaqtılıq” mäktäbe direktorı Xaridä xanım Daşkina belän äñgämä tıñladığız. Xaridä xanım Daşkina äytüençä 2006 yılnı berençelärne ike sıynıf itep tuplarğa cıyınıp toralar, çönki här yılnı bergä sıymıylar, üpkäläwçelär barlıqqa kilä ikän.
Şamil Bahautdin, Samar.
