Soñğı yıllarda Samar töbägendä ölkä Dumasına deputatlıqqa tatarlar ütärgä tırışıp qaradılar. Tik menä berseneñ dä kilep çıqmadı. Xättä inde urıslaşıp betkän, tarix öçen tatar familiäse genä qalğan şäxeslärne dä saylaw kampaniälärendä qara piar tatarlıqların doşmanlıqqa äyländerep, başlarına tübätäy kiderep, billärenä qılıç taqtırıp, deputat bulsam islamnı köçäytü yünäleşendä eşläyäçäkmen digän tuzğa yazmağannarnı çäpäp listovkalar taratalar ide.
Sızran dumasına uzğan saylawlarda bolarnıñ berse dä küzätelmägän. İke tuğan, ağalı- enele İldus häm İlsur Ğıylmanovlar rus köndäşlären artta qaldırıp Sızran şähär Dumasına deputat bulıp uzalar.
İldus äfände, töbäk tatarları öçen zur quanıç, bezneñ millättän ölkädä berençe märtäbä tatar keşese şähär Dumasına deputat bulıp uza. Niçek, nindi yullar belän ağalı- enele şundıy ciñügä ireşä aldığız?
Enem İlsur belän ikebez ike okrugtan uzdıq. Dumada awır tarmaqnı – sotsial' könküreş yünäleşen üz östemä aldım. Bu tarmaqqa xalıqqa meditsina xezmäten kürsätü dä, mäğärif, mädäniät, sport, yäşlär mäs’äläläre kerä. Enem İlsurğa da ciñel tarmaq eläkmäde. Bügenge köndä xalıqqa iñ yaqın bulğan - toraq- kommunal' xucalığı, cirle üzidarä tapşırıldı. Allağa şöker, ikebez dä uñışlı ğına eşläp barabız.
Küpme täcribä tupladığız bu eştä?
Menä ikençe yılğa çığıp barabız.
Sızranda xalıqnıñ 88% - ruslar. Niçek ciñügä ireşä aldığız?
Keşelärneñ başlarına da kilmägän ide. İke tatar, ike brat ruslarnı ciñärlär dip. Min üzem yäşägän okrugtan saylandım. Min şul uq xalıq arasında yäşim, toram. Xalıq mine kürä, belä, çağıştıra häm näticä yasadı. İlsur da üze torğan okrugtan saylandı. İkebezneñ dä maqsatıbız - xalıqqa yärdäm itü, xalıqnıñ xälen ciñeläytü.
Saylaw waqıtında Dumağa tatarlar kilä dip şom taratuçılar bulmadımı?
Yuq. Tatar dip pıçraq atu kürenmäde. Saylawlarda miña yala yapmadılar.
Bügenge Sızran tatarlarınıñ tormışında iñ zur problema dip närsäne sanıysız?
Mädäniätebezne üsterü, yäşlärne telle itü. Yaqındağı maqsatıbız – mäscedne safqa bastıru. Matdi yärdämne üzebezneñ tatarlardan tış “Plastik” zavodınıñ direktorı Vladimir Semenoviç Simonov, şähär administratsiäse daimi kürsätälär. Din, mäğärif, mädäniätne bergä alıp barırğa, yäşlärne tatar telle itü, yäşlärebez tatar cırların cırlasınnar ide.
Üzegez dinebez İslamnı ayaqqa bastıru yağında, ä namazlıqqa bastığızmı äle?
Üzem äle namazlıqqa yaqınlaşam ğına. Ä menä enem İlsur namazlar da uqi, Sızranda ikençe keşe bulıp Xac da qıldı.
Alaysa yäşlär uzdırdı?
Äye, döres äytäsez.
Şamil Bahautdin, Samar.
