Şuşı könnärdä genä şähärebezneñ «Domino» klubında «Altın köz» dip isemlängän bäyräm kiçäse bulıp uzdı. Ul «Sember cırı-2005» lawreatların büläkläwgä bağışlanğan ide. Oyıştıruçıları: «Sember» tatar maltabarları klubı häm Milli mädäni üzäk. Mondıy çara şähärebezdä berençe tapqır uzdırıldı. Anı äzerlägändä, oyıştıruçılar tübändäge maqsatlarnı küz aldında tottılar: berençedän qunaqlarnı, ölkädä yäşäp icat itüçe cırçılar belän tanıştıru; ikençedän, tatar keşelärenä tanışu häm aralaşu mömkinleklären buldıru; öçençedän, yal itü öçen böten şartlarnı tudıru. Biletlarnıñ xaqı 600 sum bulsa da, zal tulı ide: bäyrämgä maltabarlar, intelligentsiä wäkilläre häm, älbättä, telebezne, cırlarıbıznı-moñnarıbıznı söyüçe millättäşlärebez kilgännär. Kilep kerügä barlıq qunaqlarnıñ yözlärendä yılmayu päyda buldı, çönki alarnı tämledän tämle tatar xalıq aşları belän milli kiemnärdän ofitsiant qızlar qarşı aldılar.
Böten kiçä barışında «Sember cırı-2005» lawreatları cırlar başqardılar. Oyıştıruçılar tarafınnan alarğa aqçalata premiälär äzerlängän ide, şularnı şähärebezneñ däräcäle keşeläre tapşırdılar. Mäsälän, berençe urınğa layıq buluçı cırçığa, Rinat Sadıykovqa, premiäne Ul'yanovsk ölkäseneñ gubernatorı Sergey Morozovnıñ ekonomika buyınça kiñäşçese, Sember tatar maltabarları klubınıñ prezidentı – Färit Ayupov tapşırdı; 3нче urın öçen Fäniä Xaliullovağa premiäne «Novıy vek» kompaniäseneñ general' direktorı - Rinat Ğıyzzätev tapşırdı.
Äytergä kiräk, «Altın köz» bäyrämenä uzğan yıl bäygeläreneñ ciñüçeläre dä kilgän ide. Küptännän tanış bulğan cırçılarnı, İldar Ramazanovnı häm Rimma Möxämmätcanovanı tamaşaçılar bik cılı qarşı aldılar. Säxnädä Qazannan çaqırılğan qäderle qunaq – Tatarstannıñ atqazanğan artistı Vil Usmanov päyda bulğaç, tamaşaçılar tağın da canlana töştelär. Cırçı «Yuqqa tügelder» cırın başqarğanda, aña böten zal quşılıp cırladı.
Cırçılar belän berrättän biyuçelär dä tamaşaçılarnıñ küñelenä xuş kilde. Bäyrämgä şähärebezneñ tanılğan kollektivları: «Sember» cır-biyu ansamble häm «Domino» şou-baletı çaqırılğan ide.
Çarada rus cırları da yañğıradı. Kiçä barışında alarnı «Domino» klubınıñ xucası Rinat Ğıyzzätev başqardı. Rinat äfändene şähärdä küplär belälär, çönki ul maltabar ğına tügel, ä bik osta cırçı da. Anıñ «Belıyı oblaka» cırı şähärebezdä bik populyar, xätta bu cäyneñ xitı bulıp tanıldı.
Yuğarıda sanap ütelgännärdän qala, köz bäyrämendä törledän-törle milli uyınnar, konkurslar, viktorinalar oyıştırıldı. Şularnıñ berse, «Çın tatar keşese-2005» viktorinası ayırım iğtibarğa layıqtır. Bu bäyge barışında qunaqlar tatar telenä, ädäbiätına, cırına-moñına qağılışlı törle sorawlarğa cawap birdelär. Biryuza, iney, yantar, pion işe süzlärne tatar telenä tärcemä ittelär; tuğan telebezdä cırlar başqardılar, şiğerlär, tostlar, mäzäklär söylädelär. Yarış näticäsendä ike ciñüçe bilgele buldı: «Ulampek» firmasınıñ general' direktorı Kamil Musin häm Tatarstannıñ Çüpräle rayonınnan kilgän qunaq – İlmir İzmaylov. Alarnıñ ikesenä dä istälekle büläklär tapşırıldı.
Qunaqlarğa kilgändä, zalda kübese – urta yäşendäge äfändelär häm xanımnar. Aralarında ike tutaş ta bar ide. Bäyrämgä kilüläreneñ maqsatın turındağı sorawğa Rozaliä tutaş menä nindi cawap birde: «Dus qızım belän bez monda üzebezneñ millät keşese belän tanışıp bulmasmı dip kilgän idek. Qızğanıç, monda barısı da diärlek parlılar bulıp çıqtı. Şuña kürä älegä maqsatıbızğa tulısınça ireşä almadıq. Şulay bulsa da kilüebezgä ükenmibez, çönki bezgä kiçä bik oşadı. Kiläçäktä mondıy kiçälär yışraq bulsın ide. Anda yäşlär dä qatnaşsın ide.» Äye, bäyräm bik matur, küñelle ütte, disäk tä bula. Häm bu oçraşu soñğısı bulmasın digän teläktä xuşlaştılar.
Çulpan Firğalieva, Sember.
