Düşämbe könne, Çallıda, toraq yortlarda torbalardan gaz bärep torıp, 10 meñ keşe yortlarınnan çığarılğan bulğan, digän xäbär taraldı. Berniçä fatirda xätta yanğın çığıp, yäşüsmerlärneñ utta peşegue turında xäbär itelä. Gaz tawışlanıp, zur quät belän torbalardan bärep torğan, dip xäbär itelä. Zur şartlaw çığudan qurqıp, tärtip saqlawçılar, keşelärne öylärennän çığarğa quşqan. Çallınıñ ul rayonnarında gaz sünderelgäç, keşelär öylärenä qaytqan. Bu xälne, TV kanalları kiñ yaqtırttı, bu terrorçılar höcüme, dip äytüçelär dä buldı. Sişämbedä xäbär itelgänçä, Çallıdağı toraq yortlar gazğa yañadan totaştırılğan inde. Älege xälne Federal iminlek xezmäte tikşerelgän. Agentlıqlar xäbär itkänçä, federal iminlek xezmäte belgeçläre, bu xäldä texnik citeşsezleklär säbäpçe bulğan, digän näticägä çığarğan. Qayber mäğlümatlarğa qarağanda, avariä, gaz stansiäsendä basımnı köyläwçe cihazlar watıluı arqasında kilep çıqqan.
