Accessibility links

Кайнар хәбәр

Dini uqu yortlarında tatar telen uqıtu öçen maxsus däresleklär eşlänäçäk


“Möselman dini uqu yortlarında tatar tele häm ädäbiäten uqıtu” dip isemlängäne kiñäşmäne küptän tügel oyışqan “Üzebez” yaña buın xäräkäte Ş. Märcäni isemendäge tarix institutı häm Tatarstan Möselmannarı diniä näzaräte belän berlektä oyıştırdı. Bilgele bulğança,“Üzebez“ yaña buın xäräkäte oyışqaç uq tatar telen kiñ dairädäge qullanışqa qaytaru buyınça qayğırta başladı. Sişämbe könne alar din ölkäsenä tuqtaldılar. Xalqıbıznı tuğan teldä dingä torğan, şariğat qanunnarın tuğan telebezdä öyrätä, wäğäz söyli alırlıq belgeçlär kiräklegenä basım yasıy alar. Kiñäşmäneñ açılışında bu xaqta Tarix institutı ölkän xezmätkäre, “Üzebez” xäräkäte koordinatorı Rezidä Safiullina da borçılıp söyläde.

Kiñäşmädä dini mäğärif ölkäsendä eşläwçe uqıtuçılar, tatar tele belgeçläre, tatar cämäğätçelege wäkilläre qatnaştı

Bilgele belem birü berençe çiratta metodik äsbaplardan, däresleklärdän başlana. Älege kiñäşmädä dä töp basım şuña yasaldı.

“Üzebez” yaña buın xäräkäte wäkilläre bu mäs’äläneñ şaqtıy citdi buluın assızıqladılar, çönki dini uqu yortlarında tatar telen uqıtu şaqtıy az buluı mäğlüm. Monnan tış dini uqu yortlarında belem aluçı yäşlärneñ küpçelege rus telendä söyläşüe dä ser tügel. Häm ul problema bulıp qala.

Kiñäşmädä Tatarstan Mäğärif häm fän ministrlığı milli bülege baş belgeçe Gölfiä Gaynetdinova bu ölkädä eşneñ citdi baruın bilgeläde. Xäzerge waqıtta dini uqu yortları uqıtuçıları, metodistlar, ğalimnär belän berlektä maxsus programma eşlänäçägen assızıqladı.

Şulay uq professor Flyura Safiullina dini uqu yortlarında qullanır öçen tatar tele däreslegen yartı yıl öçendä eşläp birä aluın äytte. Qısqası, kiñäşmädä dini uqu yortları öçen maxsus däresleklär eşlärgä tezläwçelärneñ barlığı açıqlandı.

Kiñäşmädä dini uqu yortlarında belem aluçı studentlarğa tatar telendä söyläşergä qızıqsınu uyatu kiräklege dä assızıqlandı. Bilgele bulğança, Tatarstannan çittän kilep uquçı studentlarnıñ kübese tuğan tellären belmi häm öyränmi dä. Kiñäşmä azağında maxsus qarar qabul itelde. Anda mäçet-mädräsälärdä tatar telen aktiv qullanışqa kertü,

mädräsälärdä tatar ädäbiäte häm matbuğat bazasın buldıru, çit töbäklärdän kilgän yäşlär öçen tatar tele buyınça äzerlek kursları oyıştıru kebek punktlar bar.

Ber aydan “Üzebez” yaña buın xäräkäte koordinatorları “Tatar mäktäplärendä äxlaq mäs’äläse” digän kiñäşmä uzdıraçağın äytte.

Landış Xarrasova.

XS
SM
MD
LG