2005 yıl Novosibirski tatarları küñelenä küp törle mädäni çaralar belän kerep qalır disäk, yalğış bulmas. Şunsı da iğtibarğa layıq, milli çaralarnıñ qayberläre Seber federal' okrugı külämendä ütkärelde. Mart ayında uzğan tatar sänğäte festivalendä, iyün ayında oyıştırılğan ölkä sabantuyda qatnaşuçılar Novosibirskinıñ awıl-rayonnarınnan ğına tügel, Tatarstannan, Başqortstannan, Omski, Tomski, Kemerovo, İrkutski, Barnawl şähärlärennän häm Qazaxstannan da buldılar. Novosibirskinıñ tatarlar tuplanıp yäşägän awıllarınıñ kübesendä sabantuylar ütte. Elekke yıllarda awıl-rayonnar sabantuyları ölkä tatar mädäniät üzäge tırışlığı belän ütkärelä idelär. 2005-nçe yılda tatar üzäge bu eşne tulısınça awıl-rayonnarnıñ mädäniät xezmätkärläre qulına tapşırdı. Üze sabantuylar oyıştıruda metodik yärdäm kürsätü belän genä çiklände. Annan tış tatar üzäge aktivistları başqa töbäklärdä ütkärelgän törle bäygelärdä, festival'lärdä dä qatnaştılar.
Tatar üzäge aktivistı, Läysän ansamble konsertların alıp baruçı Ğaysa Xösnetdinov 2005 yılda ölkädä ütkärelgän möhim çaralar dip, Sabantuylarnı ğına tügel, Qazannıñ meñyellığında qatnaşuların da sanıy.
2005–nçe yılda Novosibirskinıñ ölkä tatar mädäniät üzäge qarşında balalar tatar sänğäte studiäse açılıp, eşli başladı. Studiä qarşında tatar tele, cır, biyü häm qul eşläre tügäräkläre eşli. Balalar anda tatarça söyläşergä, uqırğa-yazarğa, cırlarğa-biergä öyränälär, milli ornamentlar belän tanışalar. Studiä üktäber' ayında ğına açılğan bulsa da, balalar inde üzlären şähär külämendä berniqädär tanıttılar da. Studiäneñ täqdir itü kiçäsendä, tatar mädäniät üzägeneñ 15 yıllıq bäyrämendä, şähär külämendä ütkärelgän 3-nçe milli-mädäniätlär festivalendä häm “Läysän” estrada törkeme citäkçese Rafik Avliärovnıñ yubiley kiçäsendä çığışlar yasadılar. Elekke yıllarda ütkärelgän milli-mädäniätlär festivalendä asılda “Läysän” ansamble çığış yasıy ide. Bıyılğı festival'dä tatar sänğät studiäse balaları “Yäşlek” ansamble yäşüsmerläre belän bergä tatar üzäge metodistı Elsinä Şäymärdänova ssenariyie buyınça quyılğan “Ğailä portretın” kürsättelär. Alarnıñ çığışları tamaşaçılarnıñ küñelenä ayıruça bixuş kilde, - di Rauza xanım.
Novosibirski tatar üzägeneñ 2006-nçe yılda başqarası qayber eş plannarı da inde äzer. Ğaysa Xösnetdinov süzlärençä, alar şähärdä tatar mäktäbe açarğa niätlilär, seber yağı federal' okruğı tatarlarınıñ qorıltayı ütkärüne küzdä totalar. Ämma älegä bu plannarnı tormışqa aşıru mömkinlekläre yuq. İkençe yaqtan bu eşlärneñ matdi yağı da xäl itelmägän häm räsmi dairälärneñ xuplawın tapmağan. Rauza Tixomirova - bu eşkä alınsaq, tatar üzägeneñ eşçänlegenä zıyan kilüe dä mömkin, dip sanıy. Citäkçe bularaq, min üzäkne awır xälgä quya almıym, - di Rauza xanım.
Saniä Mirxaleewa. Novosibirski-Omski.
