Brüssel. 4 meñläp körd bügen Belgiä başqalasında Yewropa Berlege idaräse binası qarşında cıyın ütkärep, törek ğäskärläreneñ tönyaq Ğiraqqa kerüwenä qarşı buluwın belderde. Şul cıyında qatnaşuçılar fikerençä, Törkiäneñ Ğiraqqa basıp kerüwe, andağı körd töbäklärendä 1991-nçe yıldan soñ urnaşqan ğämäli moxtariatne yuqqa çığaraçaq. Näq şundıy uq cıyın comğa könne Londonda da, britan premyer-ministrı idaräse qarşında ütte. Änkara üzeneñ çınnan da Ğiraqnıñ tönyağına üz ğäskärlären cibärü mömkinlegen tikşerüwe xaqında beldergän ide. Törek xökümäte, suğış başlanğan oçraqta Ğiraqtan üz ilenä küpläp qaçaqlar kilüwennän qurqa, häm berük waqıtta andağı törki azçılıqlarnı yaqlarğa teläwen äytä. Uzğan atnada Törkiäneñ parlamentı ildä 62 meñ amerikan ğäskärien urnaştırunı küz aldında totqan xökümät täqdimen xuplıy almadı, aldağı berniçä kön eçendä xökümät şul täqdimne yänä yasıy ala dip xäbär itelä.
