Katolik çirkäweneñ üzäge Vatikan qalasında kiçä Qazan waqıtı belän tönge 12nçe yartıda Rim Papası İoann Paul ikençe wafat buldı.
Berniçä kön elek anıñ xäle kinät naçarayıp ul sulış problemaları, yäşäw öçen möhim äğzalarınıñ yalqınsınuın kiçergän ide. Kiçä kiç Vatikanda anıñ wafatı iğlan itelde. Dönya tarixına üzenä genä xas, çağıştırmaslıq öleş kertkän şuşı olı şäxeskä xätimäne Azatlıqnıñ yäkşämbe irtän efirğa çığaçaq tapşıruında tıñlağız.
İtaliä 3 könlek mätäm iğlan itte. AQŞ prezidentı George
Bush, dönya "keşelärneñ ireklegendä berençelekne totuçını" yuğalttı, dip belderde: "İoann Paul İkençe millionlağan amerikan häm dönyadağı başqa keşelärgä ilham birep tordı. Bez härçaq tarixtağı iñ zur ruxi yulbaşçılarnıñ bersenä äylängän tıynaq, aqıllı häm qurqu belmägän ruxanine xäterliäçäkbez. Polşa ulı, soñınnan Rim papası bulğan keşene bezdä birgäne öçen bez xodayğa şöker qılabız," dide Bush.
Polşanıñ elekke prezidentı Lech Walesa, Rim papası bulmasa, "kommunizmğa noqta quyılmas ide, häm anıñ näticäse qan qoyu belän tämamlanır ide," dide.
Elekke Sovetlar Berlege prezidentı Mixail Gorbaçev – Rim Papası dönyada berençe sanlı humanist ide, dide.
BMO general sekretare Kofi Annan, Britaniä premyer-ministrı Tony Blair, Fransiä prezidentı Jacques Chiraq, İzrael tışqı eşlär ministrı Silvan Şalom häm başqa illärneñ citäkçeläre Vatikanğa qayğı urtaqlaşu xatların cibärde.
Ğaräp Ligası general sekretare Amr Mussanıñ matbuğat wäkile, İoan Paul İkençe, "tınıçlıq keşese, millätlär häm dinnär arasında söyläşügä çaqırğan keşe ide" dide....
