Русиядә рубль курсы чит ил валюталарына карата өченче көн рәттән түбәнгә тәгәри. Әлеге хәл АКШның 6 апрельдә Русия эшмәкәрләренә һәм кайбер ширкәтләренә чикләүләр керткәч башланды.
Bloomberg исәпләренә караганда, хиссәләр бәяләренең төшүе нәтиҗәсендә Русия эшмәкәрләре 9 апрель көнендә генә дә 16 млрд доллар акчасын югалткан. Әйтик, санкцияләр кертелгән Олег Дерипаска һәм Виктор Вексельбергның өлеше булган "РусАл" ширкәте хиссәләре якынча 30 процентка төште.
11 апрельдән Нью-Йорк тауар биржасы фьючерс килешүләре белән "РусАл" ширкәте чыгаручы тимерне сатып алуны туктата.
Сишәмбе Лондонның тимер сату биржасы 17 апрельдән "РусАл" алюминие белән сәүдә итүне туктатачагы турында белдерде.