Дөнья беренчелеге

12 июль 2018

Дөнья футбол беренчелеге инде берничә көннән башлана. Футбол беренчелеге уңаеннан Русиядә нинди кагыйдәләр кертелә? Чемпионатта нинди илләр катнаша?

Әлегә кадәр футбол турында ишетеп тә, артык кызыксынмасагыз, Азатлык футбол чемпионатына багышланган язмада төп сорауларга җавап бирә.

Моннан тыш Казанның әлеге уеннарга, футбол җанатарларын каршыларга ничек әзерләнүе турында Азатлык фотогалереясен тәкъдим итәбез.

Казан футбол бәйрәменә әзерләнә

1/27 Футбол җанатарлары зонасына керү капкасында кунакларны урыс һәм инглиз телләрендә генә сәламләү язулары каршы ала. Татарстанның дәүләт теле булган татар телендә бер сүз дә язылмаган.

2/27 Футбол җанатарлары үзәгенә илтүче яңа юлга юл билгеләре урнаштырыла

3/27 Җанатарлар зонасына керү өлешендә тимер капкалар һәм аҗдаһа һәйкәле

4/27 "Казан" гаилә үзәге янында урнашкан җанатарлар мәркәзенең тыштан күренеше

5/27 Җанатарлар зонасына бару юлында машиналарны чикләү җайланмасы урнаштырыла

6/27 Татмедиа бинасы алдында яңа төзелгән парк

7/27 Туристлар өчен экскурсия автобуслары 1 июньнән Казанның яңа маршруты буйлап йөри башлады

8/27 Сибгать Хәким урамы чемпионат барышында транспорт хәрәкәтенә ябылды һәм анда күбесенчә хәрбиләр кизү тора

9/27 Сибгать Хәким урамында машина һәм җәяүлеләр хәрәкәтенең футбол чемпионаты вакытында туктатылуы турында игълан.

10/27 Казан-Арена футбол стадионына баручы Сибгать Хәким урамындагы барлык йорт керешләренә чәчәкле савытлар элеп чыкканнар. Йортларда яшәүчеләр чемпионат беткәч чәчәкләрне алмасыннар иде дигән теләк белдерә

11/27 Чемпионат матчлары узачак Казан-Арена футбол стадионындагы зур экранда көне буе шушындый реклам сурәте тора

12/27 Казан-Арена футбол стадионы янындагы автобус тукталышында татарча язулы реклам рәсеме игътибарны ерактан җәлеп итә

14/27 Казан-Арена алдында футбол символларын чагылдырган бизәкле дивар

15/27 Казан-Арена стадионы алдында урнаштырылган бизәкле дивар

16/27 Яшел үлән белән эшләнгән футбол тубы һәм футбол уйный торган махсус аяк киемен сурәтләүче инсталяция

17/27 "Визит Татарстан" бренды белән Казанның туристлар күп йөри торган урыннарында мәгълүмат үзәкләре булдырылган. Тик аларның күбесендә хезмәткәрләр татар телен белмәү сәбәпле, татарча мәгълүмат алып булмый

18/27 Бауман урамында чемпионатка килгән туристларга мәгълүмат бирү үзәге хезмәткәрләре бары урыс һәм инглиз телләрендә генә сөйли белә. Татарча эндәшкәч җилкә сикертүдән ары китә алмыйлар

19/27 Бауман урамындагы футбол җанатарлары өчен куелган юл күкрсәткеч

20/27 Бауман урамына куелган футбол чемпионаты символы янында истәлек фотосына төшүчеләр өзелеп тормый

21/27 Бауман урамында берничә урында татар ризыклары сатыла. Туристлар чәк-чәк, талкыш каләвә һәм казылыкны бик теләп ала ди татар сатучысы. Киоскларда һәдияләр сатучылардан аермалы буларак, әлеге сатучы фотога төшерүгә каршы чыкмый һәм тауарлары турында сөйләүдән тартынмый. Кайбер туристлар бер алганда унар тартма чәк-чәк ала, әмма футбол җанатарлары әле бик күренми дип тә өсти

22/27 Казанның тимер юл вокзалы белән елга вокзалы арасында туристлар өчен махсус ретро-трамвай йөри башлады. Трамвай маршруты 40 минут дәвам итә, юл өстендә очраган тарихи биналар, урамнар, Казанда яшәгән танылган шәхесләр турында төрле телләрдә мәгълүмат бирелә. Трамвай өстендә түбәтәйгә охшаш җайланма булганга күрә, халык бу трамвайны түбәтәйле трамвай дип атый. Трамвай атнаның пәнҗешәмбе, җомга, шимбә, якшәмбе көннәрендә эшли. Билеты 200 сум тора.

23/27 1986 елда төзелгән ретро-трамвайда өстәлләр урнаштырылган. Теләгән һәркем "Түбәтәй" кафесы тәкъдим иткән татар ризыкларын авыз итә ала

24/27 Ретро-трамвай эчендә "Түбәтәй" ашханәсендә пешерелгән өчпочмак, чәк-чәк, өлеш кебек татар ризыклары тәкъдим ителә.

25/27 Казан үзәгендәге күп кенә машина юллары һәм җәяүле юллары төзекләндерелә. Кол Шәриф мәчете каршындагы мәйданның җәяүле юлларын ясаучы азәрбайҗаннар 13 июньгә кадәр барлык эшләрне төгәлләргә кушылуын әйтә. Эшләрнең сузылуын яңгырлар еш яву белән аңлаталар

26/27 Футбол җанатарлары үзәгендә әзерлек эшләре беткән диярлек

27/27 Казансу елгасы аша салынган Ленин дамбасында тимер рәшәткәләр һәр елдагыча быел да буялды. Казаннар ни өчен хакимият баштан ук күгәрми торган рәшәткәләр генә куймый икән дип аптырый.

Европа парламенты футбол чемпионатын бойкот итәргә чакырмакчы

Европа парламенты депутатлары 14 июньдә кабул ителергә тиешле Русиядә кеше хокуклары резолюциясенә футбол чемпионатына Европа берлеге түрәләре тарафыннан дипломатик бойкот белдерү турында пункт кертмәкче. Тулырак мәгълүмат Азатлык хәбәрендә.

Төркем уеннары

Чемпионатта 32 ил катнаша, алар сигез төркемгә бүленгән, һәм төркемнән ике такым 1/8 уеннарына чыга алачак. Социаль челтәрдә татар футбол җанатарлары уеннар җәдвәлен татарча да ясаган:

Татарча язулар

Казанда беренчелек уңаеннан матур плакатлар һәм реклам әзерләнгән. Кайбер урыннарда татарча язмалар да бар, ләкин язулар хаталы, алынма сүзләр күп.

Әлеге күренеш социаль челтәрләрдә тәнкыйть утына тотыла.

Хаталы язуларга Вконтакте челтәрендә фикерләр

"Экстремистларга" футбол чемпионаты вакытында Дагыстаннан чыгу тыела

Дагыстанда полиция элек экстремизм һәм террорчылык белән бәйле маддәләр нигезендә хөкем ителгән кешеләрдән дөнья футбол беренчелеге вакытында республикадан читкә чыкмау турында документ имзалатып җыеп йөри.

Самар чемпионатка әзерме?

Иртәгә башланачак Дөнья футбол беренчелеге Русиянең 11 шәһәрендә уза. Самар шәһәрендә бер атна элек газоннар туп формасында зур чәчәк түтәлләре белән бизәлгән, берничә урында мундиаль символы бүре һәйкәлләре тора. Җәмәгать транспорты тукталышларында Самар турында мәгълүмат һәм стадионга йөри торган шаттлар җәдвәле куелган.

Самарда төркем уеннарының 4 уены, 1/8 һәм ¼ уеннары узачак. Idel.Реалии чемпионат башланыр алдыннан шәһәрнең әзерлеген фотога төшереп тикшерде.

Гаджетларыгыз белән сак булыгыз!

АКШның күзләүгә каршы һәм иминлек дәүләт үзәге башлыгы Уильям Эванина Русиягә дөнья футбол чемпионатына баручыларга үзләре белән электрон җиһазлар алмаска киңәш итә. Аларга хакерлар яки Русия хөкүмәте керә алырга мөмкин ди Эванина.

Аның сүзләренчә, мондый куркыныч бигрәк тә "зур ширкәтләрнең вазифадагы затларына һәм хөкүмәт түрәләренә яный". Ул аларга моңа кадәр куллануда булмаган җиһазлар алырга киңәш итә.

Reuters-ның тагын бер чыганагы хәбәр итүенчә, мондый кисәтүне Британия махсус хезмәтләре дә чыгарган.

"Футбол бәлеше"

Футбол беренчелегенә татар җанатарлары да битараф түгел. Социаль челтәрләрдә чемпионатка багышланган менә шундый "футбол бәлеше" фотосурәте тарала.

Ә сез чемпионатка багышланган нинди ризык пешерәсез? :)

Error rendering VK.

дәвам

Accessibility links

Безгә кушылыгыз!

Дөнья беренчелеге

Казан футбол бәйрәменә әзерләнә