Татар мәдәнияте көннәре кичә рәссам Радик Мусин күргәзмәсе һәм "Риваять" төрки этник ансамбле концерты белән ачылган. Ансамбль музыкантлары 30 дан артык халык уен коралларында уйный белә, шулар арасында – татар курае, тел-курай, думбыра, сорнай, кубыз, борын-кубыз һәм башка уен кораллары бар.
Бүген Константин Ноттар исемендәге театрда Туфан Имаметдиновның "Әлиф" спектакле күрсәтеләчәк. Узган елда Нурбәк Батулла бу спектакльдә башкарган роле өчен "Алтын битлек" театр бүләге алган иде.
"Әлиф" хореографик спектаклен ноябрь ахырында Петербурда DairaFest (Даирә Fest) халыкара Шәрык сәнгате фестивалендә дә күрсәтәчәкләр.
