Русиядә хокук яклаучы Марина Литвинович Русия халкын 24 февральдә 19:00дә үзләре яшәгән шәһәрнең үзәк мәйданына чыгып, Украинага каршы сугыш башлауга ризасызлык белдерергә чакырды.
Видеомөрәҗәгатен Литвинович Facebook-та чыгарды.
— Владимир Путинның безгә карата дустанә мөнәсәбәттәге Украинага һөҗүм итүе сәбәпле күбегезнең өметсезлек, көчсезлек һәм оят хисләре кичерүен беләм. Әмма мин өметсезлеккә бирелмәскә, бүген 19 сәгатьтә үз шәһәрегезнең үзәк мәйданына чыгарга чакырам. Без Русия халкы Путин башлаган сугышка каршы дип ачык итеп белдерергә кирәк. Без бу сугышны якламыйбыз, ул безнең исемнән алып барылмый, без бу сугышка каршы. Бернидән дә курыкмагыз, мәйданнарга чыгыгыз һәм ачык итеп әйтегез”, ди Литвинович.
Бүген Русиянең күп кенә шәһәрләрендә Украинага каршы сугыш башлауга протест белдереп ялгыз пикетлар узды һәм уза. Анда катнашучыларның күбесен полиция тоткарлаган.
Иртән Кырым белән Украина арасындагы административ чиктән сивил кешеләр үз машиналарында Акмәчеткә таба агыла башлаган, юлларда тыгыннар барлыкка килгән дип сөйләде Азатлыкка шул юлдан Акмәчеткә эшкә барган Эльвина исемле кырымтатар хатыны.
— Шул юлдан ирем белән машинада барганда лесопосадкаларда Русия хәрбиләрен, бик күп БТРлар торганын күрдек, чик ягыннан атыш тавышлары ишетелә иде, диде ул.
Кырым-Украина чигендә "Чонгар" һәм "Каланчак" чик капкалары аша Украинадан килүче украин гражданнары өчен ябык, Русия чик сакчылары Кырымга бары тик Русия паспорты булганнарны гына кертә.
Кырымда чик буенда урнашкан Әрмени базар (Армянск), Акмечет (Черноморский), Җиде Къую ( Ленинский), Ор Къапу (Красноперекопск), Джанкой районнары, Керич шәһәрендәге мәктәпләрендә укулар туктатылды. Әрмени базар шәһәреннән китүчеләрне Ор Къапу шәһәренә күчерү оештырылган дип хәбәр итте Кырымның гәдәттән тыш хәлләр хезмәте.
Мәскәү тарафыннан куелган Кырым башлыгы Сергей Аксёнов Путинның Украинага һөҗүм башлау карарын тулысынча яклавын, Кырымның Төньяк каналын Украинадан су кабул итү өчен әзерләргә күрсәтмә биргәнен хәбәр итте.
Бер кеше һәлак булган, биш кеше яраланып хастаханәгә салынган. Украина үзәгендәге Черкасски өлкәсенең Умань шәһәрендә Русия ракетасы төшкән бер урында менә шундый хәл. Русия тыныч халыкны бомбаламавын, бары Украина хәрби корылмаларын гына утка тотуын белдергән иде.
Роскомнадзор медиада дәүләт цензурасы кертте
Роскомнадзор матбугат чараларыннан Украинадагы сугыш турында бары Русия дәүләт чыганаклары биргән мәгълүматны гына куллануны таләп итте.
Оешманың рәсми сайтында шундый белдерү чыкты.
Роскомнадзор шулай ук “ялган мәгълүмат таратканнарга” 5 млн сум штраф салу һәм аларның сайтларын томалау белән янады.
— Ассызыклап белдерәбез, нәкъ менә Русия рәсми мәгълүмат чыганаклары гына дөрес һәм актуаль мәгълүмат тарата”, диелә оешма белдерүендә.
"Сетевые Свободы” хокук яклау проекты рәсми чыганактан алынган мәгълүматны куллану таләбе Киңкүләм мәгълүмат чаралары турындагы канунның 47нче маддәсенә каршы килә, чөнки ул канун журналисттан мәгълүматның дөреслеген тикшерүне таләп итә дип белдерде.
Язучы Гүзәл Яхина сугышка каршы язма урнаштырды:
14:00га соңгы төп хәбәрләр:
- Украина Русия белән дипломатик мөнәсәбәтләрне тулысынча өзүен белдерде.
- НАТО Русия һөҗүм өчен "зур икътисади һәм сәяси бәя түләячәк" дип белдерде.
- Зеленский Югары радага гомум мобилизация турында канун өлгесен кертте.
- Роскомнадзор медиа чараларыннан сугыш турында бары тик рәсми Русия чыганакларына нигезләнеп язарга таләп итте.
- Русия президентының сүзчесе Дмитрий Песков Русиянең "идеаль" максаты дип Украинаны "нацистлардан чистарту" дип атады.
Украина хәрбиләре Харьков ягында каты бәрелешләр баруын, Русия хәрбиләренең үтерелүен, техниканың юк ителүен белдерә.
Украина хәрби көчләренең баш идарәсе Украина гаскәрләренең бүген урыс армиясе басып алган Мариуполь һәм Счастье шәһәрләрен кире кайтаруын белдерде.
“Дошманның кимендә 6 очкычы 2 боралагы, дистәләрчә броняланган хәрби техникасы юк ителде”, диелә белдерүдә.
Херсон юнәлешендә вазгыять авыр, әмма Украина хәрбиләре агрессорга каршылыкны дәвам итә диелә.
Чернигов өлкәсендә дә дошман көчләре туктатылуы хәбәр ителә.
Украина хәрби көчләре илне саклауны тотрыклы рәвештә дәвам итә дип белдерә Украина хәрби көчләренең баш идарәсе Facebook-та