Одесса өлкә хәрби идарәсенең оператив штабы вәкиле Сергей Братчук в Facebook-та Кара диңгездә Русиянең бер хәрби корабы юк ителүен белдерде.
Украина хәрби көчләре баш штабы исә сугышның 11 көне эчендә Русиянең югалтулары турында Facebook-та хәбәр чыгарды.
“24.02дән 07.03кә кадәр дошманның тулаем югалтуы якынча түбәндәгечә: хәрбиләр – 11 мең кешедән артык, танклар – 290, ныгытылган хәрби машиналар – 999, артиллерия системнары 117, дәррәү атыш реактив системнары (РСЗО) – 3, очкычлар – 46, боралаклар – 68, автомобильләр 454, кораблар/катерлар – 3, ягулык таша машиналары – 60”, диелә хәбәрдә.
Каты бәрелешләр сәбәпле Русиянең югалтуларын төгәл ачыклау кыен диелә.
Украина саклану министры: Русия хәрбиләрен “сюрприз” көтә
Украина саклану министры Алексей Резников Русия агрессиясенә каршы тору өчен читтән корал һәм сугыш кирәк-яраклары белән тәэмин итүдә зур тәрәккыять булуын белдерде. Ул бу турыда Facebook-та язды.
Резников Русия хәрбиләрен “сюрприз” көтүен яза.
Аның сүзләренчә, соңгы 3 көндә Украинага 50 меңнән артык шлем һәм бронежилет килгән яки ул турыда килешүгә ирешелгән.
Ул шулай ук Европадан Украинага 140 меңнән артык украин кайтуын, аларның күпчелеге ирләр булуын белдерде. Украинаны саклау көчләренә инде дистәләрчә меңе кушылган. Моннан тыш Украинаны яклап сугышырга 20 меңнән артык чит ил кешесе теләк белдерде диелә. Британиядән беренче ихтыярилар инде Украинага килгән.
Британия махсус күзләү хезмәтләре белдерүенчә, узган ял көннәрендә Русия гаскәрләренең алга баруы бик нык акрынайган.
Сугышка каршы халык иҗаты. Бу инсталляцияне бүген Екатеринбурда урнаштырганнар.
Сезгә дә мондый күренешләр очраса, безнең белән уртаклаша аласыз.
Косметика сатучы иң зур сәүдә челтәре булган Sephora Русиядә кибетләрен ябуын һәм онлайн-сәүдәне дә туктатуын белдерде.
DOXA телеграм-каналы сугышка каршы чыккан өч кызның Мәскәүнең "Братеево" эчке эшләр бүлегендә кыйналуы турында яза: кызларны кыйныйлар, битләренә су сибәләр, чәчләреннән тарталар, хәтта башларына пакет та кидерәләр. Кызлар өчен китерелгән кирәк-яракны кабул итмиләр, алар янына беркемне дә кертмиләр, диелә. "ОВД-Инфо" проекты кыйнауга дучар булган Александра Калужскихның шул турыда диктофон язмасын чыгарды. Монда тулырак.
Русия агрессиясенә каршы тору өчен Украинага Британиядән беренче ихтыярилар килә
Британиянең элекке хәрбиләре Украинада халыкара батальонда катнашырга җыена. Моның сәбәпләре төрле. Аларның берсе, мәсәлән, хатын-кызларны көчләүдән саклау өчен барам, ди. Украина тышкы эшләр министры Дмитрий Кулеба 4 мартта Русия солдатлары басып алынган территорияләрдә хатын-кызларны көчли, дип белдергән иде. Әмма Кулеба моны раслый торган фактлар китермәде. Reuters һәм башка халыкара медиа мондый очраклар булуын бәйсез чыганаклардан раслый алмады.
Азат Европа/Азатлык радиосының украин редакциясе видеосы.
Русия Украинада 211 мәктәпкә һөҗүм иткән
Сугыш башыннан бирле Русия хәрбиләре Украинада 211 мәктәпне юк иткән яки җимергән. Бу турыда Украина мәгариф министры Сергей Шкарлет телемарафонда белдерде.
“Бүгенгә 211 мәктәп дип әйтә алам. Аларның бер өлеше тулысынча юк ителгән, бер өлешенә зыян килгән”, диде Шкарлет.
Аның әйтүенчә, хәзер Украинада Русиянең тыныч халыкка карата җинаятьләре
теркәләчәк интерактив харита әзерләнә. Анда мәгариф инфраструктурасына һөҗүмнәр дә теркәлеп барачак.
