Украинада Русия дәүләт телеканалларында тапшырулар алып баручы һәм төп пропагандистлар Ольга Скабеева һәм Дмитрий Киселевка карата Украинаның ил бөтенлеген бозуга чакыру өчен җинаять эше ачылды.
Казанда "Метроэлектротранс" оешмасы хезмәткәрләре Русия агрессиясе билгесе булган "Z" хәрефе рәвешендә тезелешеп басканнар.
"Катнашырга теләгән 100 дән артык кеше бар иде, ләкин бу чара уздырылган мәйдан һәркемне сыйдыра алмады. Метро керемнәрен җыю һәм юл хәрәкәте идарәсе хезмәткәрләре электр депо йөртүчеләре белән бергә Аметьево метро станциясендә "Z"– “За Победу! (Җиңү өчен!) рәвешендә тезелешеп торды, – диелә оешманың Телеграм каналында.
Украинадагы сугышта Башкортстаннан тагын бер егет һәлак булган. Бөрҗан районыннан 20 яшьлек Байегет Бикбулатовның үлемен Пруфы басмасына район хакимиятендә раслаганнар.
“Соңгы тапкыр окоплар казыйм дип әти-әнисенә шалтыратты, ә аннары элемтәгә чыгудан туктады, - дип сөйләгән басмага абыйсы.
Аның мәгълүматларына күрә, бу атнада районның башка хәрбиләрен җирләячәкләр, ә Байбулатны - бер атнадан соң.
Азатлык Украинада һәлак булган Татарстан һәм Башкортстан егетләренең исемлегентуплап бара.
Bloomberg агентлыгы Анатолий Чубайсның Русиядән китүен хәбәр итте.
Анатолий Чубайс Русия президентының тотрыклы үсеш мәсьәләләре махсус вәкиле вазифасын бушаткан һәм илдән чыгып киткән. Бу хакта ике аноним чыганагына сылтама белән Bloomberg агентлыгы хәбәр итте. Басма язуынча, түрә Русиянең Украинага сугыш башлавына ризасызлыгын белдергән.
Чубайсның махсус вәкил вазифасыннан китүе турында, аноним чыганакка сылтама белән ТАСС дәүләт агентлыгы да хәбәр итә. Әгәр отставка турындагы мәгълүмат расланса, Чубайс – Украинада сугыш башланганнан соң эшеннән киткән Русиянең иң югары дәрәҗәле түрәсе булачак. Forbes журналы Чубайс белән телефоннан элемтәгә чыга алган, әмма чит илгә китүе турында сорау бирелгәннән соң, түрә телефонын ташлаган.
The Sun Путинныкы дип фаразланган яхтада бәдрәф кәгазе өчен алтын кыстыргыч күрсәтте
Русия президенты Владимир Путинныкы дип фаразлаган "Шехерезада" яхтасының, бизәлүләрен дә исәпкә алганда, 750 миллион фунт – якынча бер миллиард доллар тирәсе торуы ихтимал. Бу хакта Британиянең The Sun таблоиды яза, басма яхтаның интерьерын карап чыккан. Журналистлар аның бизәлешен "түбәнсетердәй зиннәтле" һәм "укшытырдай арттырып җибәрелгән" дип атаган.
Басма, янәсе "Шехерезада"да төшерелгән фотоларны чыгарган. Фотоларда бәдрәф кәгазе өчен алтын кыстыргыч, спорт залында кимоно һәм кара пута фотосы, джакузи, рояль һәм зиннәтле итеп бизәлгән төшке аш залы күренә.
Яхта экипажының элеккеге бер әгъзасы газетка яхтаның тартып алынып, Украина файдасына сатылуын теләвен сөйләгән.
Украинадагы Русия башлаган сугышта Татарстаннан Сергей Кузнецов һәлак булган. Ул 1983 елда Биләрдә туган. Мәскәүгә күчеп киткәннән соң килешү нигезендә гаскәрдә хезмәт иткән. Былтыр Казанга күчерелгән. Хәрби фельдшер булган. Хатыны, ике баласы калган.
Азатлык Украинада һәлак булган Татарстан һәм Башкортстан егетләренең исемлеген туплап бара.
Татарстанда эшмәкәрләр төбәкнең бизнес-омбудмены Фәрит Әбделганиевка тауарлар кытлыгына зарланган: алар шикәр, он һәм касса өчен кәгазь тасма сатып ала алмый. Бу хакта Татарстан республикасы бизнес-омбудсменының матбугат хезмәте хәбәр итә һәм мондый мөрәҗәгатьләрнең саны 11 процент дип искәртә.
Быел 1 марттан 23 мартка кадәр Татарстан президенты каршындагы эшмәкәрләр хокукын яклау вәкаләтле вәкиленә эшмәкәрләрдән телдән – 157, язмача – 29 мөрәҗәгать килгән.
"Һәр атна эшмәкәрләр белән онлайн очрашулар уздырыла, алар барышында эшмәкәрләрнең мәнфәгатьләренә һәм хокукларына кагылышлы кертелгән норматив-хокукый актлар аңлатыла. Мәсәлән, эшмәкәрләр сатуда касса җиһазларына кәгазь тасмалар булмауга зарланды һәм кәгазь чек булмавы өчен үзләренә нинди җаваплылык янавын сорады. Әгәр исәп-хисап кассада теркәлгән булса, ә аларга бәйле булмаган хәл аркасында (вакытлыча сатуда булмау) чек тасмасы юк икән, Федераль салым хезмәте аларны җаваплылыкка тартырга ниятләми" диелә хәбәрдә.
Моннан тыш эшмәкәрләр банкларның алданрак бирелгән кредитларның процентын күтәрүенә һәм хисапларны томалавына да зарланган (мондый мөрәҗәгатьләрнең күләме – 25 процент).
Сугышның 28нче көненә Украинада 121 бала һәлак булган. 167 бала төрле авырлыктагы җәрәхәтләр алган.Бу хакта Украина баш прокуратурасы белдерде.