"Новая газета" чыгудан туктады. Украинадагы сугыш беткәнчегә кадәр
"Новая газета" Кремль контролендә булмаган һәм эшен дәвам иткән соңгы басмаларның берсе иде. Бүген газет Роскомнадзордан икенче кисәтүен алган. Хәзер ул лицензиясез калырга мөмкин. Ике кисәтү дә "ят агент" турындагы канунны бозу белән бәйле диелә.
"Новая газета"ның баш мөхәррире – Нобель бүләге иясе Дмитрий Муратов укучыларына сүзен әйтте:
"Махсус операция", хәрби цензура шартларында без сезнең белән 34 көн тора алдык. Һәм без эшләдек. Хәрби хәрәкәтләр узган урыннарда, чик буе районнарында. Югалтуларны һәм җимерелүләрне бәяләдек. Ничек безнең халык берьюлы ике сугышка юл куя алганын аңларга тырыштык: Украинаны басып алу сугышына, һәм Русиядә, үз өебездә - ватандашлар сугышына. Без бергәләп тарихыбызның иң фаҗигале көннәрен кичердек. Һәм бу эзсез калмады", дип язды ул.
Басма кәгазьдә, сайтта һәм социаль челтәрләрдә чыгудан туктады.
Путинның Украинага каршы сугышында татар-башкорт егетләре кырылуы дәвам итә
Бүген чираттагы корбан турында билгеле булды. 7 мартта Украинада 1996 елгы Лениногорски егете Дамир Исламов һәлак булган. Җеназасы иртәгә уза, дип хәбәр итә Лениногорски паблигы.
Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара. Хәзергә анда Татарстаннан 20, Башкортстаннан 22 егет булды. Исемлек, ни аяныч, озыная бара.
Украина президенты идарәсе рәисенең киңәшчесе Алексей Арестович мөселманнарны мыскыл итмәскә чакырды. Элегрәк федераллар ягында сугышып Украинада үлеп калган Чечня башлыгы Рамзан Кадыйров хәрбиләрен (кадыровчыларны) чучка тиресендә җирләячәкләре турындагы хәбәрләр таралган иде.
Үзенең Facebook битендә Арестович мөселманнар белән кадыровчыларны аера белергә чакырды. Ул Украина ягында сугышучы һәм илгә ярдәм итүче шактый гына мөселманнар барлыгын әйтте.
“Кадыровчылар белән көрәшү өчен дини нигездә мыскыллауны туктатыгыз. Кадыровчылар белән сугыш кырында көрәшергә кирәк”, диде ул.
Крым.Реалии һәм Украинаның кайбер мәгълүмат чаралары журналистлары янаулы хатлар алган. Андриана Сидиропула имзалаган хатта журналистларны Русия ягына күчәргә өндиләр, юкса, “Русия Украинаның бөтен шәһәрләрен алгач”, Украинаның “Русия гаскәрләренә каршы ялган мәгълүмат” тараткан барлык журналистлары Русиянең Себердәге төрмәләренә җибәреләчәк, диелгән.
Киевтагы Кырым мөфтие Айдер Рустемов чираттагы тапкыр Русия мөселманнарына мөрәҗәгать белән чыкты. Ул Украина мөселманнарының үз илен һәм гаиләләрен саклап сугышуын һәм шәһид булып үләчәкләрен әйтте. "Ә үтерергә килгән Төньяк Кавказ хәрбиләре кем булып үләчәк?", дигән сорау куйды. Кырым мөфтие Украина ихтыяриларының Чечня сугышы вакытында федераль көчләргә каршы бәрелешләрдә катнашуын да искә төшерде.
Рустемов бүгенге көндә Русиядә, аеырым алганда Татарстан вә Башкортстанда мөселманнарның эзәрлекләнүен дә әйтте.
27 март көнне , сугыш башланганнан бирле беренче мәртәбә, Украина президенты Владимир Зеленский Русия журналистлары белән әңгәмә корды. Зеленский белән "Медуза" басмасы һәм "Дождь" телеканалы мөхәррирләре, "Новая газета"дан булган сорауны тапшырган журналист Михаил Зыгарь һәм "Коммерсантъ"ның махсус хәбәрчесе Владимир Соловьёв сөйләште. Әңгәмә "Медуза"да басылып та чыкты.
Русиянең баш прокуратурасы да басылып чыккан әңгәмәдәге белдерүләргә хокукый бәяләмәсен бирәчәген искәртте.
Аерым алганда, Зеленский Мариупольне чолгап алулары турында фикер белдергәндә, вакыйгаларны яктыртуда мәгълүмати хаос күзәтелә диде. Президент шәһәрне Русия хәрбиләре томалавын әйтте.
Портка миналар куелган. Шәһәрнең үзендә һуманитар фаҗига күзәтелә, чөнки анда азык-төлек, дару һәм су китерү мөмкин түгел. Зеленский сүзләренчә, Русия солдатлары һуманитар конвойларга ата.
Президент, кешеләрне Украина тарафына эвакуацияләү өчен, шәһәрдә вакытлы һуманитар коридорлар ачылганлыгын раслады.
Зеленский кешеләрнең бер өлешен Русия гаскәре контролендәге төбәкләргә чыгаруларын әйтте. Аның сүзләренчә, шәһәрдән барлыгы ике меңнән артык кеше чыгарылган. Аларның кайда булуы төгәл генә билгеле түгел. "Аларны алмаш фонды өчен тоталар", диде Зеленский.
Әсирләр турындагы сорауга җавап биргәндә ул Украина һәм Русиянең исемлекләр белән алмашуын хәбәр итте. Зеленский сүзләренчә, сугышта Русиядән бик яшь егетләр катнаша һәм Русия үлүчеләр турындагы мәгълүматны яшерә.
Сугыш башланганнан соң Зеленский Русиягә һәм русияләргә мөнәсәбәте бик начараюын әйтте, шул ук вакытта ул Украинаны хуплаучыларга рәхмәтле булуын искәртә.
Зеленский сүзләренчә, Русия-Украина сөйләшүләренең көн тәртибендә рус теленең статусы да бар. Русия, Румыния, Маҗарыстан, Польша кебек күршедә яшәүче халыкларның теленә хөрмәт махсус килешүдә билгеләнәчәк.
Уфаның бер кафесында Росгвардиянең Украинадагы гамәлләре турында сөйләшү аркасында Герман Әхмәтшин кулга алынган.
Әхмәтшин әйтүенчә, ул Росгвардияне мактаган камуфляж киемендә таныш булмаган кеше янына килеп, "бу оешманың кайбер хезмәткәрләре Ирпень (Украина - ред.) елгасы аша күпердә ялангач һәм янган килеш аунап ятуларын" әйткән.
Шуннан соң бәхәс купкан. Әхмәтшинга кафедан чыгарга ирек бирмәгәннәр. Полиция килеп аны бүлеккә алып киткән. Өч сәгатьтән соң Русия гаскәрен "куллануны дискредитацияләүгә юнәлтелгән гамәлләр" турындагы яңа маддә (Административ хокук бозулар кодексының 20.3.3 маддәсе) нигезендә протокол тутырып җибәргәннәр.
Роскомнадзор Русия мәгълүмат чараларыннан Украина президенты Владимир Зеленский белән интервьюны бастырмауларын таләп итте. Аның белән әңгәмәдә катнашкан журналистларга карата тикшерү башланды. "Роскомнадзор Русия матбугат вәкилләрен әлеге интервьюны бастырудан баш тарту кирәклеге турында кисәтә. Интервью алган массалы мәгълүмат чараларына карата җаваплылык дәрәҗәсен билгеләү өчен тикшерү башланды", - дип билгеләп үттеләр Роскомнадзорда.
27 март көнне Украина президенты Владимир Зеленский Русия журналистларына интервью бирде, алар арасында "Медуза", "Медиазона", "Дождь" һәм "Коммерсант" басмалары бар. Интервью инде "Медуза"да басылды.