Британия Сбербанк һәм Мәскәү кредит банкы активларын тулысынча туңдыра.
Русиягә яңа инвестицияләр кертүне тыя һәм Русиядән тимер һәм корыч тауарлар импортын тыя.
Британия санкция исемлегенә тагын сигез русиялене кертте, әлеге исемлектә "Камаз" мөдире Сергей Когогин да бар.
Русиянең Украинадагы сугышына каршы АКШ яңа санкцияләр кертте.
- Сбербанк һәм Альфа-банкка каршы тулысынча томалаучы санкцияләр.
- Чикләүгә эләккән физик затлар арасында - Владимир Путинның балигъ булган кызлары, Сергей Лавровның хатыны белән кызы, Иминлек шурасы әгъзалары, Русиянең элеккеге президенты Дмитрий Медведев һәм премьер-министр Михаил Мишустин.
- Американнарга Русиягә, шул исәптән венчур килешүләрен яки берләшүләрне да кертеп, инвестицияләр ясау тыела.
"Бу шәхесләр Русия халкы хисабына баеган. Кайберләре Путинның Украинага каршы сугышына ярдәм күрсәтүдә җаваплы. Бу гамәл аларны АКШ финанс системыннан өзә һәм Кушма Штатларда булган барлык активларын туңдыра", диелә Американың Ак йорты белдерүендә.
Чехия парламентының түбән пулаты 1932-1933 елгы Украинадагы ачлыкны украин халкы геноциды дип таныды.
Төрле мәгълүматларга караганда, ул вакытта 2 миллионнан алып 7 миллионга кадәр кеше үлгән. Депутатлар әлеге ачлыкны Мәскәүдә Сталин җитәкчелеге махсус оештырган дип искәртә. "Бүгенге резолюция тагын бер тарихи бурычын түли. Бигрәк тә Русиянең Украина җирлегендә дәвам иткән агрессиясе белән бәйле рәвештә", диелгән документта.
Депутатлар шулай ук Русия гаскәренең Киев янындагы Буча шәһәрендәге гамәлләрен хөкем итүче аерым резолюция кабул иткән.
Татар эстрадасы йолдызлары Донбасска ярдәм җыю өчен хәйрия концертында катнашачак.
Концертта катнашучылар арасында Зәйнәп Фәрхетдинова, Зөфәр Билалов, Илһам Вәлиев, Зөһрә Шәрифуллина, Алинә Шәрипҗанова, Артур Исламов, Ландыш Нигъмәтҗанова, Раяз Фәсыйхов һәм башкалар бар.
"Эш шунда, безнең халыкның аерым бер вазгыятьләрдә ватанпәрвәрлек хисе аеруча ачык чагыла. Бер генә үрнәк: урыс эстрадасының йолдыз дип аталучылары чит илләргә чыгып чапканда, татар артистлары Донбасска һуманитар ярдәм идеясе тирәсендә берләште", дигән әлеге уңайдан концертны оештыручыларның берсе, Рәшит Ваһапов исемендәге фондның җитәкчесе Рифат Фәттахов.
Украинадагы сугышта Башкортстаннан тагын бер егет һәлак булган. 22 яшьлек Арсений Кузьменко белән хушлашу иртәгә Стәрлетамакта узачак, дип хәбәр итә NewsBash.
Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара.
Татарстан театрлары, мәдәни оешмаларга Русиянең Украинага каршы башлаган сугышына теләктәшлек белдерү күрсәтмәсе төшерелгән, күрәсең. Театрлар, музейлар Z хәрефен урнаштыруны дәвам итә. Кемдер аны зур итеп ясап элеп куя, кемдер башка ысуллар таба.
Русия башлаган Украинадагы сугышта Башкортстаннан тагын бер егет һәлак булган. 22 яшьлек Винер Сәйфуллин контракт нигезендә хезмәт иткән. Бу хакта Кыйгы районы хакимиятенең Вконтакте битендә язылган.
Сәйфуллин 1999 елны Югары Кыгыйда туган. 2018 елда армиягә алынган һәм 2019 елда Оренбур өлкәсе Тоцкое – 4 бистәсе хәрби бүлегендә контракт нигезендә хезмәт итә башлаган.
Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара.
Русиядә томаланган "Медиазона", Republic, "Тайга.Инфо" һәм Чиләбенең "Лентачел" басмасы Мәскәүнең Тверь районы мәхкәмәсенә үзләрен томалаулары турындагы карарларны канунсыз дип табуны таләп итеп дәгъва тапшырган. Бу хакта "Сетевые свободы" проекты хәбәр итә.
24 февральдә Русия Украинага каршы сугыш башлаганнан соң, Роскомнадзор мәгълүмат чараларыннан бу вакыйгаларны яктыртканда бары тик Русиянең рәсми чыганакларыннан алынган мәгълүмат-белешмәләрне генә куллануларын таләп итте.
Шуннан соң Баш прокуратура хәрби хәрәкәтләрне, янәсе Русия гаскәре турында "ялган белешмәләр урнаштырып"яктырткан сайтларны томалауны таләп итә башлады.
"Редакция бу гамәлләрне канунсыз дип саный һәм мәхкәмәгә мөрәҗәгать итте. Томалауны кичекмәстән гамәлдән чыгаруларыннан тыш, "Тайга.инфо" шулай ук мәхкәмәне Баш прокуратураның 24 февральдә һәм 9 марттагы таләпләрен, [томалау турындагы карарны Роскомнадзор аларга нигезләнеп кабул иткән] канунсыз дип тануны сорый", диелә "Тайга.инфо белдерүендә.
"Тайга.Инфо" дәгъвасы нигезендә мәхкәмә утырышы 21 апрельдә узачак.
"Сетевые свободы" шушындый ук дәгъваларны "ВКонтакте" томалаган Ateo паблигы, DOXA студентлар журналы һәм башка мәгълүмат чаралары да әзерләвен хәбәр итә.