АКШ алмаз чыгаручы "Алроса" ширкәтләре төркеменә һәм "Объединенная судостроительная корпорация"гә (ОСК) томалаучы санкцияләр керткән. Чикләүләр исемлегенә ОСК мөдирләр шурасының 8 әгъзасы да эләккән.
АКШ финанс министрлыгы матбугат хәбәрендә әйтелүенчә, яңа санкцияләр сугыш алып бару өчен Русияне "өстәмә керемнәрдән" мәхрүм итәчәк.
Берләшкән милләтләр оешмасының гомум мәҗлесе Русияне кеше хокуклары шурасында катнашуыннан туктатып тора. Бу Украинадагы сугыш белән бәйле.
Тавышка куелган резолюциядә әйтелгәнчә, Украинада барган сугышта Русия хәрбиләре тарафыннан дорфа һәм системлы рәвештә кеше хокуклары бозыла. Кеше хокуклары шурасыннан Русияне чыгаруны 93 ил хуплап тавыш биргән. 24 ил, шул исәптән, Кытай һәм Казакъстан каршы булуын белдергән. 58 дәүләт, алар арасында Һиндстан да бар, тавыш бирүдән тыелып торган.
Тыелып калучыларны исәпкә алмаганда, резолюцияне кабул итәр өчен 193 илнең өчтән икесе тавыш бирүе кирәк. Reuters мәгълүматларынна күрә, Русия әлеге карарны яклап тавыш бирүчеләрне яисә тыелып калучыларны үзенә карата дустанә булмаган адым дип бәяләячәген кисәткән.
Моңа кадәр Русия Украинада халыкка карата булган агрессия гаепләүләрен кире кагып килде. БМОның кеше хокуклары шурасы эшеннән аерым дәүләтләрне туктатып тору сирәк була. Соңгы тапкыр мондый хәл 2011 елның мартында булды. Ул вакытта Либиянең эшчәнлеге туктатылган иде. Бу диктатор Муаммар Каддафиның хакимияткә каршы чыгыш ясаган катнашучыларына карата хәрби көчләр куллануы белән бәйле булды.
Мәскәү кеше хокуклары шурасыннан читләштерелгәннән соң утырышларда һәм тавыш бирүдә катнаша алмаячак. Шул ук вакытта Русия дипломатларына дебатларда утыра алачак. Reutersның дипломатлар даирәсендәге чыганаклары хәбәр иткәнчә, Русия үзенең ышанычлы затлары белән БМОның шурасына йогынты ясарга тырышачак.
Дмитрий Муратовка поездда буяу атканнар
Билгесез кеше "Новая газета" баш мөхәррире һәм Нобель премиясе иясе Дмитрий Муратовка ацетонлы буяу ыргытып һөҗүм иткән. Ул "Муратов, бу сиңа безнең егетләребез өчен" дип кычкырган, ди Муратов.
Кушма Штатлар "Аэрофлот", Azur Air һәм Utair Русия авиаширкәтләрен 180 көнгә экспорт өстенлекләреннән мәхрүм итте. Бу хакта АКШ Сәүдә министрлыгы хәбәр итә.
Карарны "экспорт санкцияләрен бозуның дәвам итүе" белән аңлаттылар. "Без аларны АКШ тауарларын алу мөмкинлегеннән генә түгел, ә чит илдәге Америка тауарларын реэкспортлаудан да мәхрүм итәбез. Безнең экспорт контролен боза торган теләсә нинди ширкәт, бигрәк тә Владимир Путин мәнфәгатьләрен яклаучылар һәм Украина халкына зыян салучылар, хокук куллану чараларының бөтен куәтен тоячак", дип белдерде сәүдә министры Джина Раймондо. Сәүдә министры урынбасары Дон Грейвс бүгенге гамәлләр белән махсус контроль чараларына буйсынмаучыларга ачык сигнал җибәрелә, диде.
Львов мэры Андрей Садовой кайнар нокталардан эвакуацияләнгән украиннарга вакытлыча яшәү өчен контейнерлар шәһәрчеге төзелүен сөйләде. "88 торак контейнерда 350 дән артык кеше яши алачак. Бер өйдә 2-4 кеше яши ала. Эчендә кирәкле җиһазлар, яктылык, җылылык бар. Санузеллар һәм ашханә шәһәр территориясендә урнашкан", дип белдерде мэр.
Аннексияләнгән Кырымда Русиянең ФСБ хезмәткәрләре, кырымтатар ихтыяриларыннан торган Номан Челебиджихан исемендәге батальон (аны Русия хакимиятләре канунсыз кораллы төркем дип саный) тарафдарын тоткарлаган.Бу хакта Федераль иминлек хезмәтенең Кырымдагы идарәсе вәкиленә сылтама белән 7 апрельдә Крыминформ агентлыгы хәбәр итте.
1971 елда туган ир-атны "канунсыз кораллы төркем эшчәнлегендә катнашуда шикләнәләр", диелә.
"Ул милли батальонны формалы кием, азык-төлек, акча белән тәэмин иткән", шулай ук "Херсон өлкәсенең Генически районында берничә мәртәбә Русиягә каршы чараларда катнашкан", шул исәптән Русиянең Украинада башлаган сугышы барышында да, дип яза агентлык.
Ирне качак кыяфәтендә Русия чиген үтеп чыккан вакытта тоткарлаганнар диелә, аңа канунсыз кораллы төркемдә катнашу маддәсе (Җинаятьләр Кодексының 208 маддәсе, 2 өлеше) нигезендә җинаять эше ачылуы хәбәр ителә, бу маддә 15 елга кадәр иректән мәхрүм итүне күз уңында тота. Русиянең Акмәчеттәге Киев районы мәхкәмәсе аны ике айга сак астына җибәргән.
Кремль беренче мәртәбә рәсми рәвештә Катерина Тихонова һәм Мария Воронцованың Русия президенты Владимир Путин кызлары булуын таныды, кичә, 6 апрельдә аларга каршы АКШ санкцияләр керткән иде.
Русия президенты сүзчесе Дмитрий Песков журналистлар белән әңгәмәсендә Путин кызларына каршы кертелгән чикләүләргә Кремль һичшиксез җавап бирәчәк һәм "моны ничек кирәк дип табачак, шулай эшләячәк", дип белдерде.
Элегрәк эндокринолог Мария Воронцова һәм фәнни менеджер Катерина Тихонованың үз кызлары булуын Русия президенты танымады да, кире дә какмады.
Тулырак Азатлык сәхифәсендә.
Украинадагы сугышта Башкортстаннан тагын бер кеше һәлак булган. Чишмә районыннан Владислав Авдеев белән хушлашу турында үз социаль челтәрендә район башлыгы Ришат Мансуров язды.
Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара.