Көнгә нәтиҗә ясыйбыз, бүгенге төп 5 хәбәр:
2 апрель иртәсенә кыскача хәбәрләр:
- Япония тышкы эшләре министрлыгы Украинадагы сугышка бәйле Русиянең 398 ватандашына һәм 28 оешмасына чикләүләр кертте. Исемлектә, аерым алганда, депутатлар, кайбер министрлар, гаскәр башлыклары, Сбербанк һәм Альфа-банк бар.
- Украина белән чиктәш Белгород өлкәсенең Шебекинский районында тимер юллар җимерелгән дип хәбәр итте төбәк губернаторы Вячелав Гладков. Сәбәпләре турында соңрак әйтербез дигән. Кичә Русиянең көньяк төбәкләрендә террор куркынычының югары дәрәҗәсе кертелде.
- Русия көньягында һава аланнарына очышларны чикләү 2022 елның 19 апреленә кадәр озайтылган.
- Русия сугыш башлаганнан бирле Украинада 186 бала һәлак булган, 344 бала яраланган дип хәбәр итә илнең Баш прокурор офисы.
Сугыш йогынтысы. "Мунчалар бер, йортлар ике миллионга артты"
Русиядә бер ай эчендә төзелеш материалларына, шуңа бәйле рәвештә торакка бәяләр котырып үсте.
Төзелеш чыгымнары күпмегә үскән? Бер йорт салу хәзер ничә сумга чыга? Агач йортлар төзү белән шөгыльләнүче ширкәт башлыгы Алмаз Галәветдинов Азатлык сорауларына җавап бирде.
Финляндиянең Nokia ширкәте Русия базарыннан китү турында белдерде.
"Украинага һөҗүмнең беренче көннәреннән, Nokia-га Русиядә башка кала алмаячагы билгеле иде. Соңгы атналарда без тәэмин итүләрне, яңа бизнесыбызны туктаттык һәм чикләнгән фәнни-тикшеренү эшчәнлегебезне Русиядән читкә күчерәбез. Хәзер без Русия базарыннан китүебез турында игълан итә алабыз", диелә ширкәт белдерүендә.
Шул ук вакытта Nokia алга таба да Русиядәге телекоммуникация челтәрләренең эшкә сәләтлелеген тәэмин итәргә ниятли һәм санкцияләр шартларында моның өчен кирәкле лицензияләрне алуга гариза бирәчәк.
Телекоммуникация җиһазлары белән глобаль тәэмин итүчеләрнең беренче өчлегенә Nokia һәм Кытайның Huawei-ыннан тыш, швед ширкәте Ericsson да керә, кичә, 11 апрельдә швед ширкәте дә Русиядә эшчәнлеген туктатуын игълан иткән иде.
Кудрин: Русиядә тулай җитештерү күләме быел 10 процентка кимиячәк
Русиянең элекке финанс министры, хәзерге Хисап пулаты башлыгы Алексей Кудрин Мәскәү Украинага каршы сугыш башлаганнан соң кертелгән чикләүләр нәтиҗәсендә Русиядә икътисады 10лап процентка төшәчәк дип белдерде.
Дөнья банкы Русия тулай җитештерү күләменең 11,2 процентка төшәчәк дип фаразлаган иде. Башка Көнбатыш аналитиклары Русиядә тулай җитештерү күләме 12 процентка төшәр, инфляция 23 процент булыр дип фаразлый.
Сугыш башланганнан бирле Украинадан 4,6 миллионнан арттык кеше күчеп киткән. Бер тәүлек эчендә илдән китүчеләр саны 68 мең булган дип хәбәр итә БМОның качаклар эшләре комиссары идарәсе.
Бучада 400дән артык кеше үтерелгән
Бу хакта Киев хәрби өлкә идарәсе башлыгы Александр Павлюк хәбәр итте. Моңарчы Буча мэры Анатолий Федорук 320 һәлак булган кеше турында әйткән иде.
Русия оккупациясеннән соң Буча урамнарында мәетләр таралып ята (фотодәлилләр)
Mash: "Дождь" каналын "терроризм һәм хакимиятне яулап алуга өндәмәләр" өчен тикшерәләр.
Янәсе, "Дождь" каналының Ютубында бронетехниканы Кремльгә борырга дигән капслоклы өндәмәләр урнаштырылган булган, дип яза Mash.
"Дождь" каналының баш мөхәррире Тихон Дзядко: "Дождь" Ютубында безнең редакция беркайчан да андый өндәмәләр бастырмаган. Гомумән, капслок (зур хәрефләр) белән язуны без әдәпсезлек дип саныйбыз.
2022 елның 1 мартында Роскомнадзор "Дождь" телеканалы сайтын томалаган. 3 март көнне канал эшен вакытлыча туктату турында игълан итте, каналның күп кенә алып баручылары һәм хәбәрчеләре Русиядән китте.