Readovka аның Вконтакте аккаунтын кемдер ватып ачкан дип белдерде
Төнлә ул сәхифәдә Русия армиясе югалтулары турында яңа мәгълүмат барлыкка килгән иде. Постта Русия саклану министрлыгы ябык брифинг үткәргәне, анда Украинадагы сугышта 13 414 кеше һәлак булган, 7 мең кеше хәбәрсез югалган дип әйтелгәне язылган иде.
Readovka бу постны оператив бетерүе һәм ватып ачу чыганагы табылуын белдерде, ләкин бу чыганакны атамады.
Моңарчы Русия саклану министрлыгы югалтулар тапкыр соңгы тапкыр 25 март көнне хәбәр иткән иде. Ул вакытта 1351 хәрби һәлак булган, 3825 кеше яраланган диелгән иде.
Украина генштабы бүген китергән хисапта Русия сугыш дәвамында 21 200 кеше югалткан дип хәбәр итте.
Essity швед ширкәте Русиядән китүен игълан итте
Essity ширкәте шәхси гигиена кирәк-яракларын җитештерә. Русиядә аның Zewa, Libresse, Leukoplast, Tork брендлары булган.
Русиядән китүне ширкәт бизнес алып бару шартлары начараюы белән аңлата. Русия Украинада сугыш башлаганнан соң илдән 750дән артык ширкәт киткән.
Петербурда әләкләү өчен махсус Telegram чат-бот ясалган
"Бердәм Русия" фиркасенең Петербур бүлекчәсе Telegram-да махсус чат-бот булдырган. Ул "фейк хәбәрләр турында сигналлар" кабул итәчәк, диелә бүлекчәнең матбугат хезмәтендә.
"Фейклар" турында хәбәрләр депутат сораулары буларак Роскомнадзорга җибәреләчәк диелә.
Русия хакимияте Украинага каршы алып барган сугыш турында үз позициясе белән туры килмәгән барлык хәбәрләрне "фейк" дип атый, илдә хәтта сугышны "сугыш" дип атау рөхсәт ителми. Сугыш башланганнан соң ашыгыч кабул ителгән "фейклар турында" канун нигезендә административ һәм җинаять эшләре ачыла.
Сәясәтче Кара-Мурзага фейклар кануны нигезендә җинаять эше ачылган
Сәясәтче, журналист Владимир Кара-Мурзага каршы Русия армиясе турында фейклар маддәсе нигезендә җинаять эше ачылган. Бу хакта аның адвокаты Вадим Прохоров хәбәр итте. Сәясәтче хәзер Тикшерү комитетында.
Кара-Мурза 12 апрель көнне 15 тәүлеккә сакка алынган иде. Аны полициягә буйсынмауда гаепләгәннәр иде.
АКШ Украинага ил гаскәре ихтыяҗларын исәпкә алып ясалган дроннар җибәрәчәк
Бу дроннарның үзенә урнаштырылган матдәне шартлатып, куелган максатка килеп бәрелүче Switchblade пилотсыз очкычы нигезендә эшләнелүе билгеле.
Тулырак монда укый аласыз.
Сугыш шартларында милләт язмышы. Тукай бүләгенә намзәтләр ни уйлый?
Азатлыкта җомга язмасы Тукай бүләгенә дәгъва кылучыларның хәзерге шартларда милләр язмышына багышланган.
Тукай бүләгенә быел 19 шәхес һәм иҗат берләшмәсе дәгъва итә. Азатлык алардан бүгенге вазгыятьтә милләт, тел, мәдәнияткә урын калачакмы һәм татарлар ни рәвешле үз сүзен әйтергә тиеш дип кызыксынды. Җаваплар каршылыклы булды.
– Никадәр генә томаларга тырышмасыннар, кешеләр бер әйбер турында сөйләшә, ул – Украинадагы хәлләр. Телевидение көне-төне пропаганда белән шөгыльләнә. Без моны Советлар берлеге вакытында уздык. Азатлык радиосын ул вакытта да томаладылар, качып булса да тыңлый идек. Кешеләр куркытылган иде, әле дә нәкъ шулай. Әмма без исән калдык, без хәтта калкып чыгып үз сүзебезне әйтеп, Татарстанны булдыра алдык.
Язманы биредә укып була.
Сугыш башыннан бирле Роскомнадзор 300дән артык сайтны томалаган
Мондый санны "Новая газета. Европа" басмасы китерә. Бу Русия интернет-цензурасының бөтен тарихы дәвамында томалаулар саныннан 20 тапкыр күбрәк, ди алар.
Русия инде күптәннән, Украинага һөҗүм алдыннан ук интернетны контроль итү механизмнарын әзерләгән, дип белдерә басма.
Хокук яклаучы Лев Пономарев Русиядән киткән
Танылган хокук яклаучы Лев Пономарев Русиядән китүе турында хәбәр итте. Аның сүзләренчә, ул илдән вакытлыча, ялга гына киткән, чөнки аның һәм аның хокук яклау оешмалары тирәсендәге вазгыять "борчулы".
2020 елда Азатлыкка биргән әңгәмәдә Лев Пономарев "Тоталитар режимны торгызуга таба барабыз" дип сөйләгән иде.