Әлмәттә яшәүче Гөлназ (исемен иминлек максатларында үзгәртеп бирәбез) ирен Украинадагы сугышка озаткан. 30 сентябрьдә аның ире мобилизациягә эләгә, ә инде 30 октябрьдә аны Татарстаннан Украина чигенә җибәрәләр. Хәзер ул фронт сызыгында. "Ашарларына юк, командирлары ташлап киткән, окопларына су үтә, юеш киемнәрдә йоклыйлар" дип сөйли ул. Путин режимы башлаган сугышның нәрсә өчен кирәклеген дә аңламый ул. "Үземә дә, иремә дә Украинадагы җирләр кирәк түгел" дип елый.