Accessibility links

Кайнар хәбәр

Медиа: Башкортстан мәгариф министры Айбулат Хаҗин вазифасыннан китә


Айбулат Хаҗин
Айбулат Хаҗин

Хаҗин вазифасын Корылтайга депутат итеп сайлануы сәбәпле калдыра.

Башкортстан мәгариф министры Айбулат Хаҗин вазифасыннан китә. Бу хакта үз чыганакларына сылтама белән Башкортстан медиалары хәбәр итә.

Хаҗин вазифасын Корылтайга депутат итеп сайлануы һәм "шәхси ниятләре" сәбәпле калдыра, дип сөйләгән Mkset-ка республика хөкүмәтендәге чыганагы.

Басма мәгълүматынча, хәзерге вакытта хөкүмәттә Хаҗинга алмаш эзлиләр. Мөгаен аның урынына урынбасарларыннан берсе килер, әмма мәсьәлә әлегә ахыргача хәл ителмәгән диелә.

Министрның Корылтайга депутат итеп сайлануы сәбәпле вазифасын калдырачагын "Пруфы" басмасына Башкортстан хөкүмәтендәге чыганагы да раслаган. Министр вазифаларын Хаҗинның беренче урынбасары Илдар Мәүлетбердин башкарачак дип белдергән ул.

Айбулат Хаҗинны мәгариф министры итеп республикага Радий Хәбиров килгәннән соң билгеләделәр.

Башкорт милли хәрәкәте вәкилләре Айбулат Хаҗиннан инкыйлаби үзгәрешләр уздырыр, иҗтимагый оешмалар белән бергә хәрәкәт итәр дип көтмәде. Башкорт дәүләт телен мәктәпләрдә мәҗбүри уку хокукын кире кайтара алмас, әмма телләр үсешенә дә комачауламас дигән өметтә булды.

  • Быел Башкортстан Корылтаеның VII чакырылышына 110 депутат сайланды. Алар киләсе 5 ел дәвамында парламентта эшләячәк. Тавыш бирүләр 10 сентябрьдә үтте. "Бердәм Русия" партиясе парламенттагы 110 урынның 87сен алган.
  • Башкорт милли хәрәкәтенең чит илдәге комитеты халыкны тавыш бирүне инкяр итәргә чакырды. Башкорт комитеты фикеренчә, федерализм өчен чыгыш ясаучы фиркаләр теркәлмәде һәм алар сайлауда катнаштырылмады. Шулай ук тавыш бирүдә Башкортстан бәйсезлеген яклаучы сәяси көчләр юклыгы да әйтелә.
  • Башкортстан Дәүләт җыены-Королтай депутаты булып Американ ватандашлыгыннан баш тарткан ММА көрәшчесе Джефф Монсон да сайланды.

Белешмә: Айбулат Хаҗин
Айбулат Хаҗин 1973 елда Уфада туган. Уфаның 1нче санлы медицина училищесын, Башкорт дәүләт педагогия институтын тәмамлаган. Педагогия фәннәре кандидаты.
Хезмәт эшчәнлеген 1996 елда Аргаяш мәктәбендә химия укытучысы булып башлый.
1997-2001 елларда Урал дәүләт физик культура академиясе аспиранты, аны тәмамлагач 2008 елга кадәр Урал дәүләт физик культура университетының педагогика кафедрасы доценты, декан урынбасары булып эшли.
2008-2009 елларда Уфа ягулык-энергетика көллиятенең мөдир урынбасары.
2009 елда Зәйнәп Биишева исемендәге Стәрлетамак дәүләт педагогия академиясының укытыу эшләре проректоры була.
2009-2010 елларда Башкортстан хөкүмәте идарәсенең мәгариф бүлеге мөдире булып эшли.
2010 елда Башкортстан мәгариф өлкәсендә контроль һәм күзәтчелек идарәсе җитәкчесе урынбасары булып билгеләнә.
2014-2016 елларда Башкортстан мәгариф министрының беренче урынбасары.
2016-2018 елларда Башкортстан мәгариф өлкәсендә контроль һәм күзәтчелек идарәсе җитәкчесе.


🛑 Русиядә Азатлык сайты томаланды, нишләргә? Безнең кулланма.
🌐 Безнең Telegram каналына да кушылырга онытмагыз!

Форум

Русия хакимиятләре Азатлык радиосын "теләнмәгән оешма" дип тамгалады. Фикер язар алдыннан Русиянең "теләнмәгән оешмалар" турындагы кануны таләпләре белән танышырга киңәш итәбез.
XS
SM
MD
LG