Äye, Aq bars komandası soñğı sigezençe yılda Rusiäneñ çempionı buldı.
1998 yılda mondıy däräcägä ul ber ireşkän ide inde. İnde, Rusiä xokkey çempionatı tarixında Aq bars ikençe märtäbä Omskinıñ Avangard kumandasın ciñep, üzen berençe itep rasladı. Berençe belän ikençe ciñü arasında ayırma da bar. elekkegese anıñ kumandılar arasında ciñü ğomumi punktlardan çığıp bilgelänsä, xäzergese isä pleyoff, yäğni, berniçä oçraşu waqıtında, kem kübräk ciñä. Ä oçraşularda Aq bars ciñde. Qazanda ike uyın ütte, ikesendä dä Aq bars ciñde. İnde, öçençe häm dürtençe uyınnar Omskida uzırğa tieş ide. Ägär, Omskida Avangard ciñgän oçraqta, tağın ber, bişençe uyın Qazanda uzarğa tieş bulıp çıqtı. Läkin, waqiğalar moña barıp citmäde. Aq bars, Omskida uzğan öçençe uyında ciñde dä Rusiäneñ çempionı buldı. Yäğni, küpçelek uyınnarnı ciñgäç, dürtençene uynap torunıñ mäğnäse yuq.
Aq Bars belän Avangard Omskida biş meñ keşe sıyışlı sarayda xokkey uynağannı yartı Qazan küzätte dip äyterlek. Omskiğa, Aq bars canatarlarınnan 150 läp keşe genä barsa, Qazanda isä, nindi sport kafe bar, yä bulmasa, qayda uyınnı TV aşa qarap bula, şunda şığrım tulı xalıq. Äle bit, öylärdä, divanğa yatıp TV qarawçılar bixisap. Monnan tış, Aq bars ike qat Avangardnı ciñgän boz sarayı – Tatneft' arenada meñgä yaqın keşe cıyılğan. Böten xalıq uyınnı qarıy. Ä uyında, berençe alqanı Aq bars qapqalarına Avangardlar kertte. Bette, Avangardlar ciñde dip awırsınğanda, Aq basr alqalar kertä başlaı Avangardqa. Ber, ike, öç!!! Öç bülektän orğan uyın tämam, Aq Bars çempion. Uyınğa, Rusiäneñ sport kanalınnan añlatmalar birep barğan Grigoriy Tvaltvadze. Urısçalap efirğa qıçqıra "Daaa..... vot poprobuyte prolomit' stenı Qazanskoğo kremlya". Omskinıñ boz sarayında, xalıq güli. Xokkey uyınınıñ belgeçläre, Avangard canatarları da, Aq bars ciñüen matur itep kiçerdelär. Yäğni, qayber uyın barışındağı kebek qıynaşu, tartqalaşu-etkäläşü bulmağan. Qazan uramnarın bu waqıtta kürsägez. Üzäktä bigräktä. Böten cirdä xalıq ağımı, Aq bars çempion dip qıçqıra. Ber –bersen qotlıy. Bit, meñ yıllıqqa da büläk bulalmağan çempionlıq, Qazannıñ 1001 yıllığına büläk buldı. Aq bars klubınıñ prezidentı Şäfäğät Täxäütdinov Qazan merı İlsur Metşinğa şaltıratıp, uyın betkäç ük, şulay dip beldergän dä. Yäğni, ciñü Qazannıñ 1001 yıllığana bağışlana dip. Tatneft' ul- Aq barsnıñ ximayäçese.
Qazanğa Aq bars uyınçıları şul uq kiçtä qayttı. Ä alarnı qarşı alırğa, Qazannan 30 çaqırımdağı aeroportqa 2 meñgä yaqın canatar cıyılğan bulğan. Oçqıç ike säğätkä soñarıp qaytuına qaramastan, xalıq taralmıyça, uyınçılarnı kötep torğan . Küz aldına kiteregez, xätta, ällä nindi prezidentlar kilgändä dä, mondıy bäyräm bulmıy. Aeroportqa barıp qarşı alu. Tönlä. Tatarstanlılar öçen ğorurlıq bu. Hawa alanında çempionlıq kuboğın kürsätü, canatarlarnıñ çempion dp qıçqıruı - bu tamaşa. Monı süz belän äytep bulmıy.
Aq barsnıñ Avangard kumandasın ciñep, Rusiäneñ ikençe märtäbä çempionı buluı ber bäyräm. Rubin sport kumandası, Tatarstanğa tağın Spartak kumandasın ciñde. Qazanda bulğan uyında, ikegä nul' belän Rubin ciñep, premyer liganıñ dürtençe däräcäsenä mende.
Bu ğına tügel. UNİKS basketbol kumandası Mäskäwneñ Dinamo kumandasın ciñde. Bu yal könnärendä buldı.
Şulay itep, Tatarstannıñ öç köçle kumandası da, üz tör sportlarında ciñü yawladı. Läkin, töp şatlıqnı Aq bars alıp kilde. Çönki, alar Rusiäneñ çempionı. Ä qalğannarı, futbolda da, basketbolda da, äle çempion bulu yulında ğına.
Räfis Cämdixan
