Kondopoga şähärendä suğışuda qatnaşqan tağın ber keşe totqarlanğan. İnterfaks belderüençä, totqarlanğan Mozgaliev elek üterüdä ğäyeplänep xökem itelgän bulğan. Tikşerü uylawınça, Mozgaliev 30 nçı avgustta restoranda kavkazlılar belän suğışnı başlawçılarnıñ berse. Bu suğışta ike keşe üterelgän ide. Şunnan soñ şähärdä kavkazlılar xuca bulğan säwdä urınnarın wata-cimerä başladılar. Üterüdä şiklänelgän 6 keşe, tärtipsezleklärdä qatnaşqan distäläp keşe totqarlanğan. 14 cinayät eşe quzğatılğan. Tikşerü eşendä Baş prokuratura, Federal' iminlek xezmäte häm Eçke eşlär ministrlığı törkemnäre dä qatnaşa.
