Çallıda küpläp balalar yuğala. Alarnı çegännär häm man'yaklar eçke orğannarın faydalanu öçen urlıylar ikän. Bu xaqta Çallınıñ üzendä genä tügel, tirä yaqtağı şähär häm rayonnarda da söyli başladılar. Azaztlıq xäbärçesenä şundıy küreneş buluı xaqında da mäğlüm buldı, şähärneñ ber mäktäbendä uquçıların tıñlata almağan uqıtuçı, balalarnı urlawçılar, eçke äğlälärne alular belän qurqıtqan. Şunıdy ısul belän uquçılarnı mäktäpkä waqıtında kilergä, waqıtında öylärenä qaytırğa, därestä tärtiple bulırğa öyrätergä telägänder inde. Äye, balalar yuğalu oçraqları şähär häm awıllarda bulıp tora. 21sentäber könne Çallı belän yänäşä bulğan Biklän awılında 8 yäşlek Veroniqa Kärimova uynarğa çıqqan cirennän yuğala. Anı çegännär urlamadımı ikän digän şik tua häm militsiä yaqındağı awıllar tiräsendä, xätta Sember, Samar yaqlarındağı çegän taborların da tikşerep çığalar. Näticäse bulmıy. Şulay dönya beterep Veronikanı ezlägän arada, 17 oktäberdä Radik Kotlyarovnıñ yuğaluı turında xäbär alına. Radik mäktäptän öenä qaytmıy. Xäzerge köngä qadär balalarnıñ tabılmawı xalıq arasında böerlär, bütäkälär, yäğni, eçke äğlälär xaqında, kön sayın balalar yuğaluı turında imeş-mimeşlärgä cirlek birde. Läkin militsiä xezmätkärläre xalıq arasında taralağan süzlärne kire qağa. Eçke eşlär idäräseneñ baliğ bulmağan balalar belän eşläw bülege başlığı Rimma İskändärova äytüençä, uramdağı süzlärdä döreslek yuq. Älbättä, ike bala yuğalu oçrağınnan qala. İnde, balalarnıñ eçke äğzaların küçerep utırtu öçen urlağannar digän süzlärne Rimma xanım da, tabiplar da dälilsez, dilär. Sotsiologiä fännäre kandidatı İskändär Yasäviev älege imeş-mimeşlärne zur şähärlär äkiätläreneñ berse, dip bäyäläde. Çınnan da, yuğalğan dip sanalğan Radik Kotlyarovnı şuşı könnärdä Çallıda kürüçelär bulğan. Anıñ kiemnäre, bit-qulları pıçranıp betkän, qaydadır suqbaylıqta yöri. Balalar inspektorları äytüençä, Radik 7 yäştän öyeñnän daimi çığıp kitä başlağan, mäktäpkä barunı yaratmıy ikän. Tärtip bozuçı balalar belän eşläwçelär fikerençä, balalarnıñ yuğaluı küp oçraqta äti-änilär bitaraflığı belän bäyle. Biklän awılınnan yuğalğan Veronika 1 sentäbergä qädär Çallıda yäşi. Änise anı şuşı awılda yäşäwçe äbisenä qaytarıp quya, şunıñ belän Veronika biredäge mäktäpkä uqırğa yöri. Tikşerüçelärneñ ber farazı mondıy- 8 yäşlek qız balanıñ änisen sağınğan buluı ixtimalı häm Çallığa qaytırğa çıqqaç yuğala. Radik Kotlyarov belän dä şundıyraq xäl: anıñ üz änise Seber yaqlarındağı ber şähärdä yäşi ikän. Malayı yuğaluı xaqında işetkäç, Çallığa qaytqan.
Ğafiulla Ğaziz, Çallı
