Ölkä tatarları öçen 2006 yıl öç 100 yıllıq yubileylar qısalarında ütte. Berençese, Orenbur cirendä tuıp üskän şağir M.Cälilneñ yubiley çaraları bulsa, ikençese, Orenburda ğasır başında dönya kürgän “Waqıt” gäciteneñ 100 yıllığın häm yañadan tergezelgän “Yaña waqıt”nıñ 15 yıllığın bilgeläp ütü buldı. Öçençese, şähärneñ X.Yamaşev isemendäge tatar kitapxanäseneñ xalıqqa berözleksez xezmät kürsätüenä näq ber ğasır buldı. Älege çaralar TR xakimiät, mädäniät-mäğärif ministrlıqları wäkilläre, Bötendönya tatar kongressı citäkçeläre yärdämendä häm qatnaşında uzdı. Kongress yärdäme belän ölkäneñ 80 yaqın tatar kitapxanäse tatar telendäge kitaplar belän tä'min itelde. X.Yamaşev häm Şarlıq rayonınıñ Mostafa awılı kitapxanälärenä meñnän artıq kitap büläk itelde. 2006 yıl başında X.Yamaşev kitapxanäse qarşında “Zamandaşlar” isemle tatar-başqort zıyalıları klubı eşli başladı.
Tatar dönyasında Tatarstannan tış yäşäwçelär öçen Qazannıñ “Yaña ğasır” televideniäsı zur rol' uynıy.
2006 yılda ölkädä iärçen tälinkälär quyıp, Qazannı qarawçılarnıñ sanı arttı. TNV kanalnı qarawnıñ ikençe yulı ul – kabelle televidenie ütkärü.
Şunıñ ürnäge bulıp, Şarlıq rayonınıñ Yañamusa awılı xalqı tora. Xäzer Tatarstannı böten awıl qarıy. Şunıñ başında yörüçe – Yañamusa awılı xakimiäte başlığı Raylä Badamşina kabelle televideniäne kürşe tatar awıllarına kertü belän mäşgül'.
Din ölkäsenä kilgändä, xällär tübändägeçä. Orenbur ölkäsendä 1990 yıllarda 19 islam dini oyışması sanalsa, xäzerge köndä terkälgännärneñ sanı 133 citä. Älege yılnı ölkäneñ millätlär häm dini oyışmalar buyınça komitet xezmätkärläre ezlänulär ütkärde. İslam dinenä qarağan ezlänülärneñ näticälärenä qarağanda, ölkä buyınça, üzlären moselman dip 19% keşe sanağan.
Yäşlär arasında islam dinenä qarata ışanıç arta töşkän. 18 yäştän 29 yäşkä qädär tulısınça dingä, dini oyışmalarğa ışanam diüçelärneñ sanı 14% yaqınayğan. Respondentlarnıñ 44% mäktäptä uquçılar dönyawi dinnärneñ tik mädäniäte belän genä tanışırğa tieş dip sanıylar. Soraw aluçılarnıñ 26% däwlät mäktäplärendä älege temağa bötenläy qağılmasqa kiräk dilär.
Massa-küläm mäğlümat çaralarınıñ islam dine xaqında söyläwläre, yä yazularına kilgändä, alar tübändägelär. 2006 yıldan “Minaret” isemle gäcit dürt bitle bulıp çığa başladı. Anı Tatar Qarğalı awılınıñ “Quş manara” mäçete näşer itä. Şulay uq TV kanalında atnasına 10 minutlıq “Qorän” tapşıruı çıqtı, RV atnalıq “Yevraziä” tapşıruında da islam turında daimi xäbärlär bulıp tordı. Yuğaltular da buldı: RV tatar telendä “Xäyerle kiç!”, TV “Yaqtaşlar” tapşıruları efirdan alındı.
2006 yılda Orenbur ölkäsendä biş mäçet açıldı.
Bu 2006 yılda, Orenbur ölkäsendä yäşäwçe, 165 meñnän artıq tatar xalqı tormışında bulğan berniçä möhim waqiğa buldı.
Firüzä Absalyamova, Orenbur
