Törkmänstan prezidentı wazıyfaların başqaruçı Gurbanğulı Birdemöxämmädov kiläse ayda ütäçäk prezident saylawlarında ciñep çıqqan oçraqta Törkmänstanda internetnı tıyunı beterergä wäğdä itte.
Çärşämbe könne saylawçılar belän oçraşuda Birdemöxämmädov "Bez transport häm elemtä çeltären cäyelderü öçen tieşle şartlar tudıraçaqbız. Min bu ölkägä bik zur iğtibar biräçäkmen. İñ soñğı texnologiälär, mäsälän internet mömkinlege ildäge härber keşedä bulırğa tieş" dide.
Ul şulay uq wafat itkän prezident Saparmurat Niyazovnıñ mäktäptä uqunı 10 yıldan 9 yılğa qaldıru qararın da küzdän kiçeräçägen äytte.
Birdemöxämmädov tağın eşsezlekkä qarşı köräşergä wäğdä birde häm däwlät ikmäk, yağulıq häm başqa könküreş äyberlärenä bäyäne tübän totunı däwam itäçäk dide.
