Uzğan atnada Omski ölkäseneñ Ülänkül awılı mäktäbendä tatar tele häm ädäbiäte buyınça olimpiada bulıp uzdı. Olimpiadanıñ töp oyıştıruçısı ölkä mäğärif ministrlığı buldı. Anda Bol'şereç'ye, Tara, Znamenqa häm Tevriz rayonnarınıñ tatar tele däresläre bulğan etnomädäni komponentlı mäktäplärneñ 9, 10, 11 sıynıflar uquçıları qatnaştı. Biremnär Tatarstan Respublikasınıñ mäğärif ministrlığı tarafınnan cibärelgän häm, äytergä kiräk, şaqtıy qatlawlı idelär. Aña da qaramastan, uquçılar birelgän eşlärne tulısınça başqarıp çıqtılar. Ölkä mäğärif ministrlığı belgeçe Xäergil'de Şakenova fikerençä, balalar tuğan tellären yaxşı belülären kürsättelär.
Ölkä külämendä oyıştırılğan bu olimpiadada 30 uquçı qatnaştı. Täbiği ki, alarnıñ eşlärenä yomğaq yasaldı, ciñüçelär bilgelände. 9 sıynıflar arasında Quşkül mäktäbe uquçısı Alina Asadullina, 10-11 sıynıflar arasında Ülänkül mäktäbe uquçıları El'wira Niäzova häm El'za Latıypova aldınğılar dip tabıldılar. Qızlarnıñ öçesenä dä 21-24 martta Qazanda uzaçaq töbäqära olimpiadada qatnaşırğa yullama birelde. Ämma, balalarnıñ Tatarstanğa bara aluları älegä soraw astında, çönki bügenge köndä säfärneñ matdi yağı xäl itelmägän. Xäergil'de Şakenova süzlärençä, ölkä mäğärif ministrlığı byudjetında mondıy çığımnar öçen mätda qaralmağan. Xäyriäçelär tabılmasa, balalarnıñ töbäqära olimpiadada qatnaşa almıy qaluları da ixtimal.
Ulänküldä ütkän olimpiada barışında uqçılarnıñ tatar telen belü däräcäläre genä tikşerelep qalmadı, anda qayber tärbiä çaraları da oyıştırıldı: törle sıynıflarda tatar tele buyınça açıq däreslär ütkärelde, patriotik cırlar smotrı uzdı. “Gömüm alğanda barlıq çaralar da Ülänkül mäktäbendä tatar telen öyrätü yaxşı däräcädä quyılğan buluın kürsätte”, - di mädäniät ministrlığı belgeçe Xäyergilde Şakenova.
