Bügenge köndä Omskida tatar balaların tuplawçı, cırğa-biyugä, azmı-küpme ğöref-ğadätlärgä, tuğan telgä öyrätüçe berdänber kollektiv – şähär tatar milli-mädäni möxtäriäte qarşında eşläwçe «Ömet» studiäse. 1998 yılda «Umırzaya» ansambleneñ ber tarmağı bulıp oyıştırılğan bu kollektivta xäzer 5 yäştän 15 yäşkäçä 30-dan artıq bala şöğellänä. Ä bu kollektiv oyışqan waqıtta tatarça cırlarğa, biergä öyränü teläge belän kilgän balalar bügen inde «Umırzaya» xalıq ansambleneñ yäşlär törkemen täşkil itälär. Xäzer ansambl'neñ ber genä konsertı alar qatnaşınnan başqa ütmi. Şulay itep, “Ürnäk kollektiv” isemen öyrätüçe “Ömet” törkeme çın mäğnäsendä «Umırzaya» kollektivın yäş talantlar belän tulılandırıp toruçı studiägä äylände dip äytergä mömkin.
«Ömet» studiäsendä inde xäzer çirattağı yäş buın tärbiälänä. Alarnıñ qayberläre kollektivqa äle küptän tügel genä kildelär. Danis Bakiev, Rawil, Älfiä häm Kärim Räximovlar, Rişat Niğmätullin, Renata Aleeva häm başqalar inde berençe adımnarın yasap konsertlarda qatnaşa başladılar. 5 yäşe dä tulmağan Danis Bakiev cırlağanda, ölkänräk tamaşaçılar küz timäsen bu balağa dip, soqlanıp utıralar.
Şuşı könnärdä genä «Ömet» balalar studiäsenä yörüçelärgä citdi imtixan totarğa turı kilde – alar qabat «Ürnäk kollektiv» isemenä layıq buluların isbatladılar. Häm, äytergä kiräk, imtixan totu ciñeldän bulmadı. Berençedän, balalarnıñ küpçelege studiädä äle berençe yıl ğına şöğellänä. İkençedän, alarnıñ çığışlarına Omski kompozitorı Aleksandr Tolstobokov räislek itkän märtäbäle komissiä bäyä birde. Şulay da balalar 40 minutlıq uñışlı ğına çığış yasap “ürnäk kollektiv” isemenä yañadan layıq buldılar. Komissiä räise Tolstobokov üzeneñ yomğaqlaw çığışında, bügen bez balalarnıñ telne, mädäniätne belülären kürdek, kollektivta törle yäştäge balalar, muzıkal' küreneştä näfis süz dä, cır da, biyu dä, instrumental' muzıka da buluı yaxşı dip,- assızıqladı.
«Soñğı yılda ğına sostavnıñ yartısınnan kübese yañartılğan kollektivım sınatmadı, bu yulı bik borçılğan idem, ä «ürnäk», yäğni «obrazsovıy» iseme 3-4 yılğa ber yaqlana»,- Ğafiä Aleewa. «Şulay da balalar bik tırıştılar, yañadan «ürnäk» isemenä layıq buldılar»,- di Ğafiä xanım. Äti-äniläre dä bik bulıştılar, balaların kön aralaş diärlek repetitsiälärgä yörttelär. Ruslan äfände Soltanov yaña kostyumnar tegärgä yärdäm itte. Başqa ata-analar imtixan totqan könne tämle milli rizıqlar peşerep kiterdelär, matur çäy östäle äzerlädelär,- di citäkçeläre Ğafiä Aleeva.
Küptän tügel Omski Däwlät Servis institutında “İslam kul'turası” dip isemlängän seminar ütkärelde. Anda berençe çiratta islam dine nigezläre turında täfsilläp söylädelär.
Öçençe kurs studentı Yäsmin Kamalova möselman tuyı, möselman qanunnarı buyınça yäşäw räweşe turında söyläde.
Annan soñ möselmança tuy yolası kürsätelde, şärıq iyülläre häm tatar xalıq cırları başqarıldı. Yäsmin Kamalova başqaruında Seber tatarları cırı “İlçebağa” yañğıradı.
Rozaliä Sayganova, Omski
